«Մեծ յոթնյակի» երկրները Բրիտանիայում կայացած գագաթնաժողովում համաձայնեցրել են Չինաստանի հետ մրցակցության պլանն Ասիայում, Աֆրիկայում եւ Լատինական Ամրիկայում: Մինչեւ 2035 թ. ենթակառուցվածքների համար նախատեսվում է տրամադրել մինչեւ 40 տրիլիոն դոլար, երկաթգծեր կառուցել Սեւ մայրցամաքում, օգնել ասիա-խաղաղօվկիանոսյան տարածաշրջանում գտնվող պետություններին, որպեսզի ստեղծեն իրենց էներգետիկան՝ առանց ածխաջրածինների: Նախորդ առերես հանդիպման ժամանակ «G-7»-ի լիդերները կոմյունիկեում նույնիսկ չեն հիշել Չինաստանի անունը: Այս անգամ ԱՄՆ-ի ճնշման տակ նրանք Պեկինին կոչ են արել դադարեցնել «բռնաճնշումները» Սինցզյանում ու Հոնկոնգում, հետեւել կորոնավիրուսի ծագմանը: Բայց պետք է նշել, որ չինական հարցում միասնական ճակատը սոսկ ձեւական բնույթ ունի, որի հետեւում թաքցվում են Վաշինգտոնի ու նրա դաշնակիցների միջեւ առկա տարաձայնությունները:
Ինչպես երեւում է Սպիտակ տան հայտարարությունից, Միացյալ Նահանգները եւ նրա դաշնակիցները հույս ունեն, որ իրենց նախաձեռնությունը, որն անվանվել է «Նորովի կառուցել լավագույն աշխարհ», ապահովելու է թափանցիկ գործընկերություն՝ աղքատ երկրներում ենթակառուցվածքներ ստեղծելու համար: «Խոսքը միայն Չինաստանի հետ առճակատման մեջ մտնելը չէ: Բանն այն է, որ մենք նախկինում չենք առաջարկել դրական այլընտրանք, որն արտացոլում է մեր արժեքներն ու բիզնեսի վարման մեր չափանիշները»,- ասել է ԱՄՆ նախագահ Ջոզեֆ Բայդենի աշխատակազմի պաշտոնյան: «Reuters» գործակալությունը հանդիպման մասնակիցների նպատակը բացատրում է ավելի պարզ եղանակով. նրանք ուզում էին աշխարհին ցույց տալ, որ հարուստ ժողովրդավարությունները կարող են աշխարհին ավելի լավ բան տալ, քան Չինաստանը: Օգնության ծրագիրը մի մաս է կազմում Չինաստանի վրա ավելի լայն ճնշման արշավի՝ կապված մարդու իրավունքների, Թայվանի եւ կորոնավիրուսի հիմնախնդիրների հետ: Սակայն, ինչպես նշում է բրիտանական «Observer» շաբաթաթերթը, «G-7»-ի որոշ առաջնորդներ, այդ թվում՝ Իտալիայի վարչապետ Մարիո Դրագին, Բայդենին կոչ են արել Չինաստանի հետ մրցակցությունը չհասցնել «եռման աստիճանի»:
Դրագին Իտալիային հեռացրել է նախորդ կառավարության գրեթե չինամետ դիրքորոշումից: Բայց նա ապացուցում է, որ անհրաժեշտ է հավասարակշռված կուրս վարել Չինաստանին մարտահրավերի եւ նրա հետ համագործակցության միջեւ: Իսկ Գերմանիան, որը միշտ զգուշորեն է վերաբերվել Պեկինի հետ առճակատմանը, համաձայն չէ ենթակառուցվածքային հիմնադրամին որոշակի գումար հատկացնել: Ֆրանսիան, իր հերթին, հանդես է գալիս այն բանի օգտին, որ ամենաաղքատ երկրներին միջոցները փոխանցվեն Արժույթի միջազգային հիմնադրամի՝ փոխառության հատուկ իրավունքների եւ արտարժույթի պահուստների հաշվին: ԵՄ արտաքին գործերի եւ անվտանգության քաղաքականության գերագույն ներկայացուցիչ Ժոզեֆ Բորելը, սակայն, պնդում է, որ Եվրամիությունը 2013-2018 թվականներին զարգացման նպատակներով տրամադրել է 414 մլրդ եվրո: Սա համեմատելի է այն բանի հետ, ինչը Չինաստանը հատկացրել է իր «Նոր մետաքսի ճանապարհ» նախաձեռնության համար: «Մեծ յոթնյակի» առաջնորդները տարակարծիք էին առանցքային հարցերի շուրջ՝ սկսած նրանից, թե երբ է անհրաժեշտ դադարեցնել ածուխի այրումը մինչեւ Պեկինի «Գոտի եւ ճանապարհ» ծրագրին դիմակայության նպատակով միլիարդավոր դոլարների հատկացման պարտավորությունը: Այս մասին մեկնաբանություն է կատարել «Նյու Յորք Թայմսը»: Կոմյունիկեում չի նշվում, որ արեւմտյան ընկերություններին արգելվում է մասնակցել հարկադիր աշխատանքի օգտագործմամբ իրագործվող նախագծերին: Ինչպես պնդում են արեւմտյան լրատվամիջոցները, այն կիրառվում է ՉԺՀ-ի Սինցզյան-Ույգուրյան ինքնավար շրջանում:
«Նեզավիսիմայա գազետային» տված հարցազրույցում Ե. Մ. Պրիմակովի անվան համաշխարհային տնտեսության եւ միջազգային հարաբերությունների ինստիտուտի տնօրենի տեղակալ Ալեքսանդր Լոմանովը նշել է. «Զարգացող երկրների ենթակառուցվածքային եւ արդյունաբերական ներդրումների կարիքները գերազանցում են «G-7»-ի եւ Չինաստանի ընդհանուր հնարավորությունները: Եթե աշխարհում իրավիճակը նորմալ էր, ապա կողմերը պետք է ընդհանուր լեզու գտնեին, թե ինչպես ավելի լավ օգնեն աղքատներին: Բայց հիմա զրոյական գումարով խաղ է ընթանում: Եթե Արեւմուտքը վարկեր ու ներդրումներ ստանալու համար աֆրիկյան երկրներից պահանջի հրաժարվել չինական նախագծից եւ խոստանալ զարգացնել ժողովրդավարությունը, ապա դրանից ոչ մի լավ բան չի ստացվի: Ամեն ինչ կախված կլինի այն բանից, թե Արեւմուտքը որքան ուժեղ հակաչինական տարր կընդգրկի իր ծրագրում: Բացի այդ, դա զերծ է մանրամասներից. հայտնի չէ, թե որքան գումար է հատկացվում, ինչ ժամանակահատվածի համար, ով է տնօրինելու այդ գումարը: Կապալառուների հարցը նույնպես կարեւոր է: Արեւմուտքն ակնհայտորեն չի ցանկանում, որ իրենց կողմից ֆինանսավորված նախագծին մասնակցեն չինացի ձեռներեցները, ովքեր կարող են այն ավելի արդյունավետ իրականացնել»:
Գագաթնաժողովին հրավիրված էր նաեւ Հնդկաստանի վարչապետ Նարենդրա Մոդին, ով կորոնավիրուսի տարածման պատճառով քննարկումներին մասնակցել է օնլայն ձեւաչափով: «Այդուհանդերձ, «Յոթնյակի» պլանն արձագանք է գտել Հնդկաստանում: Հնդկաստանը հավանությամբ է ընդունել երրորդ աշխարհին օգնություն ցուցաբերելու զարգացած երկրների մտադրությունը: Խնդիրը միայն այն է, որ նրանց ծրագրում կոնկրետություն չկա»,- նշել է «India Strategic» ամսագրի խմբագիր-խորհրդական Վիննայ Շուկլան:
