Թուրքիայի գործողություններն ավելի ու ավելի սանձարձակ են դառնում: Լիբիայում, Սիրիայում, Արցախում կատարած պատերազմական հանցագործությունների համար համարժեք վերաբերմունքի եւ պատժի չարժանանալով՝ Անկարան արդեն սկսել է ոտնահարել մարդու հիմնարար իրավունքներին վերաբերող, ինչպես նաեւ միջազգային դիվանագիտական բոլոր կոնվենցիաներն ու նորմերը: Այս երկրի հատուկ ծառայություններն սկսել են գործողություններ իրականացնել այլ պետությունների տարածքներում՝ կոպտորեն խախտելով վերջիններիս սուվերենությունը:
Այսպես՝ 1990-ականների կեսերից Ղրղզստանում բնակվող Թուրքիայի նախկին քաղաքացի Օրհան Ինանդան հունիսի 1-ին անհետացել էր մայրաքաղաք Բիշքեկում: Նրա կինը հայտարարել էր, որ Ինանդան Թուրքիայի դեսպանատան տարածքում է: Ղրղզստանի ՆԳ նախարարությունը նրա նկատմամբ հայտարարել էր միջազգային հետախուզում: Մի քանի օր անց՝ հուլիսի 5-ին Թայիփ Էրդողանը հայտարարեց, որ Օրհան Ինանդան Թուրքիայի հատուկ ծառայությունների կողմից տեղափոխվել է Թուրքիա եւ պատասխանատվության կենթարկվի Կենտրոնական Ասիայում ընդդիմադիր իսլամական քարոզիչ Ֆեթուլլահ Գյուլենի FETO կազմակերպության օգտին աշխատելու համար: Անկարան Գյուլենի կազմակերպությունը համարում է ահաբեկչական:
Էրդողանն այս կազմակերպությանը մեղադրել էր 2016-ի հուլիսին հեղաշրջման փորձին մասնակցելու մեջ: Նկատենք, որ հեղաշրջման մեղադրանքով Թուրքիայում 80.000 մարդ էր ձերբակալվել, շուրջ 150.000 քաղաքացիական ծառայող եւ զինվորական հեռացվել էին աշխատանքից: Սակայն այդ ժամանակ Գյուլենը ԱՄՆ-ում էր եւ դատապարտել էր հեղաշրջման փորձը՝ հերքելով դրանում իր մասնակցության մասին խոսակցությունները: Իսկ Օրհան Ինանդան Ղրղզստանում հիմնել էր «Սապատ» կրթական հաստատությունների լայն ցանցը, որում ընդգրկված են բազմաթիվ ճեմարաններ, դպրոցներ եւ համալսարաններ:
Ղրղզստանի արտաքին գործերի նախարարությունն արդեն նոտա է փոխանցել այդ երկրում Թուրքիայի դեսպանին՝ պահանջելով վերադարձնել իր քաղաքացուն եւ նրա հանդեպ պահպանել միջազգային հումանիտար իրավունքի բոլոր նորմերը:
Միանշանակ է, որ Թուրքիան չի վերադարձնի Օրհան Ինանդային եւ կանտեսի միջազգային իրավապաշտպան կազմակերպությունների բոլոր հնարավոր հորդորները եւ պայմանները: Նկատենք, որ Անկարան նման սանձարձակ վարքագիծ է ցուցաբերում իր հռչակած «Մեծ Թուրանի» տարածքում: Թուրքիայի նման վարքն ուղիղ հարված է միջազգային հարաբերությունները կարգավորող բազմաթիվ կոնվենցիաների եւ պայմանագրերի հիմնարար նորմերին, ինչը միայն Ղրղզստանի խնդիրը չէ, այլ ողջ քաղաքակիրթ աշխարհի, քանի որ կարեւորագույն միջազգային իրավակարգավորումների նման արժեզրկումն աշխարհը քաոսի տանելու անդրանիկ քայլն է: Եթե միջազգային կառույցները Թուրքիային այսօր չկանգնեցնեն, վաղն ամբողջ Եվրասիան քաոսի կմատնվի…
