Թուրքիայի նախագահ Ռեջեփ Թայիփ Էրդողանը երկօրյա պաշտոնական այցով ժամանել է Հյուսիսային Կիպրոսի ինքնահռչակ թուրքական պետություն:
Պատմական իրադարձության այս օրը՝ հուլիսի 20-ին Էրդողանը ելույթով է հանդես գալու խորհրդարանի հատուկ նիստին, որտեղ խոստացել է «լավ լուր» հրապարակել: Նա նաեւ ներկա է լինելու ռազմական զորահանդեսին:
Էրդողանի հետ Հյուսիսային Կիպրոս են այցելել նաեւ Թուրքիայի մեջլիսի խոսնակ Մուստաֆա Շենթոփը, «Ազգայնական շարժում» կուսակցության ղեկավար Դեւլեթ Բահչելին, Խորհրդարանական պատվիրակության այլ անդամներ:
1974 թվականի հուլիսի 20-ին Թուրքիան ներխուժեց Կիպրոս՝ օկուպացնելով կղզու հյուսիսային հատվածը: Թուրքական ուժերը Հյուսիսային Կիպրոսից տարհանեցին հարյուր հազարավոր հույների եւ այն բնակեցրին թուրքերով, իսկ արդեն 1983 թվականին այստեղ հռչակեցին այսպես կոչված «Հյուսիսային Կիպրոսի Թուրքական Հանրապետությունը», որ ճանաչված չէ միջազգային հանրության կողմից: Այն ճանաչում է միայն Թուրքիան:
