«Իսլամական պետություն» ահաբեկչական կազմակերպության ղեկավար Աբու ալ-Հասան ալ-Հաշեմի ալ-Կուրաշին զոհվել է մարտական գործողությունների ժամանակ: Այս մասին, ինչպես հայտնում է «Ռոյթերս» գործակալությունը, օրերս հայտարարել է խմբավորման ներկայացուցիչը: Վերջինս իր հաղորդման մեջ շեշտել է, որ ալ-Կուրաշին զոհվել է «Աստծո թշնամիների դեմ պայքարում»: Այլ մանրամասներ չեն հաղորդվում:
Հայտարարվել է նաեւ, որ ահաբեկչական կազմակերպությունն ընտրել է նոր ղեկավարի՝ Աբու ալ-Հուսեյն ալ-Հուսեյնի ալ-Կուրաշիին՝ նրան կոչ անելով հավատարմության երդում տալ: Ինչպես բացատրել է «The Guardian»-ը, Կուրաշի անունը վերաբերում է Մուհամեդ մարգարեի ցեղին: Ներկայացուցիչը մանրամասներ չի հայտնել նոր առաջնորդի մասին, սակայն ասել է, որ նա ջիհադի «վետերան» է:
Սպիտակ տան ազգային անվտանգության խորհրդի ռազմավարական ենթակառուցվածքների համակարգող Ջոն Կիրբին ողջունել է ալ-Կուրաշիի մահվան մասին հաղորդումը: Վաշինգտոնը հայտարարել է, որ «Իսլամական պետության» առաջնորդը հոկտեմբերին է զոհվել Սիրիայում ավիահարվածի արդյունքում, բայց չի հստակեցրել, թե ինչու է այդ մասին հայտարարվում ավելի քան մեկ ամիս անց:
Ամերիկացի զինվորականները հայտնել են նաեւ, որ ալ-Կուրաշիի դեմ գործողությունն իրականացրել են այսպես կոչված «Սիրիայի ազատ բանակի» սիրիացի ապստամբները հարավային Դարա նահանգում: Ինչպես գրում է բրիտանական «The Guardian»-ը, հոկտեմբերի կեսերին Դամասկոսը հայտարարել էր, որ նահանգի հարավում նախկին ապստամբների հետ համատեղ գործողություն է սկսել «Իսլամական պետություն» կոչված ահաբեկչական կազմակերպության դեմ:
Ահաբեկչական այս կազմակերպությունը Աբու ալ-Հասան ալ-Հաշեմի ալ-Կուրաշիին իր նոր առաջնորդ էր ընտրել մարտին, երբ զոհվել էր նախկին ղեկավարը՝ Աբու Իբրահիմ ալ-Հաշեմի ալ-Կուրաշին: Վերջինս պայթեցրել էր իրեն ու շրջապատին Սիրիայում ամերիկյան հակաահաբեկչական գործողության ժամանակ:
Այսպես կոչված «Իսլամական պետության» դաժան կառավարումը, որի ժամանակ ահաբեկիչները սպանել են հազարավոր մարդկանց, ավարտվել է իրաքյան ու միջազգային ուժերի կողմից 2017 թ. Մոսուլում ջախջախմամբ: Այդ ժամանակվանից կազմակերպությունն ընդհատակյա գործունեություն է իրականացնում՝ շարունակելով ահաբեկչական գործողություններ կատարել Իրաքում, Սիրիայում եւ այլ երկրներում:
Արաբական Միացյալ Էմիրությունների «Al-Ain»-ը գրում է, որ այսպես կոչված «Իսլամական պետությունը» դեռեւս սպառնալիք է Մերձավոր Արեւելքում: Վերլուծաբանների կարծիքով՝ դեռ վաղ է խոսել դրա լիակատար ոչնչացման մասին, քանի որ կազմակերպությունն արդեն հայտարարություն է տարածել նոր ղեկավարի ընտրության վերաբերյալ: Բայց նաեւ փաստ է, որ բարձրացվել է «Իսլամական պետության» ճակատագրի հարցը:
Կազմակերպության ներկայացուցիչ Աբու ալ-Մուհաջիրը հայտարարել է, որ ալ-Կուրաշին սպանվել է մարտում, սակայն որեւէ այլ մանրամասն չի հաղորդել:
Աբու ալ-Հասան ալ-Հաշեմի ալ-Կուրաշիի սպանության մասին հաղորդումը բազմաթիվ հարցեր է առաջացրել կազմակերպության ճակատագրի վերաբերյալ՝ կապված նրա առաջնորդների՝ մեկ առ մեկ չեզոքացման հետ։ Եգիպտացի վերլուծաբան Ահմեդ Բանը կարծում է, որ ալ-Կուրաշիի սպանությունը եւս մեկ հարված էր ահաբեկչական կազմակերպությանը, որը դեռ վտանգ է ներկայացնում տարածաշրջանի համար։
Փորձագետը նշել է, որ ամերիկյան ղեկավարությունը շարունակում է ոչնչացնել այսպես կոչված «Իսլամական պետության» առաջնորդներին, իսկ Աբու ալ-Հասան ալ-Հաշիմի ալ-Կուրաշիի սպանությունը նրանց «բարոյական հաղթանակն է»։
ԱՄՆ-ն զբաղվում է, այսպես ասած, «գլուխներ կտրելով». այս ռազմավարությունն ուղղված է ամբողջ աշխարհում ահաբեկչական կազմակերպությունների առաջնորդների վերացմանը՝ ահաբեկիչների շարքերում քաոս սերմանելու, նրանց ծրագրերը խափանելու եւ ծայրահեղական խմբավորումների անդամներին պառակտելու նպատակով։
Հիշեցնենք, որ Աբու ալ-Հասան ալ-Հաշեմի ալ-Կուրաշիի սպանությունը տեղի ունեցավ ընդամենը երեք ամիս անց այն բանից հետո, երբ ամերիկյան ուժերը ոչնչացրին «Ալ-Քաիդայի» առաջնորդ Այման ալ Զավահիրիին:
Ահաբեկչական այս կազմակերպության ղեկավարների ակտիվ «գլխատումը» բացատրվում է այդ կառույցի թուլությամբ ու անկայունությամբ: «Իսլամական պետությունն» այլեւս այնպիսի վախ չի ներշնչում, ինչպես նախկինում, բայց նաեւ ժամանակ առ ժամանակ իր մասին հիշեցնում է Սիրիայում եւ Իրաքում:
Ըստ Բանի՝ ահաբեկչական խմբավորումը դեռ ունակ է փոխել ղեկավարությանը եւ պահպանել ազդեցությունը Սիրիայի հյուսիսում ու Իրաքի որոշ շրջաններում, քանի որ որոշակի ազդեցություն ունի այդ տարածաշրջանում:
Ռազմական փորձագետ Ահմեդ Սուլթանը կարծում է, որ ալ-Կուրաշիի սպանությունը պլանավորված չի եղել, այլ կատարվել է պատահաբար՝ սիրիական խմբավորումների հետ բախման ժամանակ: «Ղեկավարի սպանությունն իրենից բարոյական լուրջ պարտություն է ներկայացնում ահաբեկչական կազմակերպության համար՝ հատկապես հաշվի առնելով, որ Կուրաշին դրա ղեկավար էր դարձել այս տարվա փետրվարին»,- ասել է նա:
Ալ-Կուրաշիի չեզոքացումը կթուլացնի վստահությունը կազմակերպության անդամների միջեւ, կհանգեցնի նահանջի ու խոշոր անհաջողությունների: Վերլուծաբանը շեշտել է, որ վերջին շաբաթներին «Իսլամական պետության» ակտիվությունը նվազել է՝ այս տարվա ընթացքում հասնելով իր ամենացածր մակարդակին: Բացի այդ, կառույցում ներքին լուրջ ճգնաժամ է սկսվել, եւ կազմակերպությունը ողջ ուժերով փորձում է հաղթահարել այն՝ նույնիսկ խորամանկելով ու հայտարարելով անհայտ «նոր ղեկավարի» մասին:
Փորձագետը ենթադրում է, որ խմբավորումը մոտ ժամանակներս կտուժի, սակայն կշարունակի պահպանել իր գոյությունը: Ահաբեկչական կազմակերպությունը կշարունակի հարձակումները ճամբարների եւ կալանավայրերի վրա, որտեղ պահվում են նրա առաջնորդները, եւ քաոս կսերմանի Աֆրիկայի եւ Ասիայի խոցելի շրջաններում:
Նույն կարծիքին է նաեւ «Իսլամական խմբի վերածնունդ» կուսակցության հիմնադիր եւ ռազմական վերլուծաբան Վալիդ ալ-Բուրշը։ Այսպես կոչված «Իսլամական պետությունը», ըստ նրա, մնացել է առանց կառուցվածքի եւ ռեսուրսների, իսկ «դանդաղ գործողության ռումբեր» կան միայն Սիրիայի հյուսիսում ու Իրաքում:
Նա շեշտել է, որ ահաբեկչական կազմակերպությունը թուլացել է եւ վերջին շրջանում հենվում է միայն փոքր խմբերի վրա։ Զրկվել է հսկայական տարածքներից, որոնցից ամենակարեւորներն Իրաքի եւ Սիրիայի շրջաններն են։
