Միացյալ Նահանգների համար հիմնական մարտահրավերներից է Չինաստանի տնտեսական հզորությանը հակազդելն ու աշխարհում առաջատար դիրքի պահպանումը։ Այդ մոտեցումներն ամրագրված են անցած տարվա հոկտեմբերին հրապարակված ԱՄՆ ազգային անվտանգության ռազմավարության մեջ, որտեղ Չինաստանը ներկայացված է որպես «միակ մրցակիցը՝ միջազգային կարգը փոխելու մտադրությամբ եւ այդ նպատակին հասնելու համար տնտեսական, դիվանագիտական, ռազմական եւ տեխնոլոգիական հզորության աճով»: Չինաստանին տնտեսական մրցակցությունում հաղթելու նպատակով Միացյալ Նահանգներն սկսել է կոնկրետ քայլեր ձեռնարկել։ ԱՄՆ Կոնգրեսի Ներկայացուցիչների պալատը հավանություն է տվել Չինաստանի հարցով սեփական հատուկ հանձնաժողով ստեղծելու առաջարկին։ Երեքշաբթի օրը Կոնգրեսի ստորին պալատում ընդունվել է «ԱՄՆ-ի եւ Չինաստանի Կոմունիստական կուսակցության միջեւ ռազմավարական մրցակցության հարցերով հատուկ հանձնաժողով ստեղծելու մասին» որոշումը։
Հանձնաժողովի ստեղծման նախաձեռնությամբ հանդես են եկել ԱՄՆ ընդդիմադիր Հանրապետական կուսակցության պատգամավորները, որոնք նոյեմբերի միջանկյալ ընտրություններից հետո մեծամասնություն են ստացել։ Սակայն այն փաստը, որ հանրապետականների հետ միասին բանաձեւին կողմ են քվեարկել նաեւ 146 դեմոկրատներ, վկայում է նախաձեռնությանը երկկուսակցական բավական լայն աջակցության մասին: ՏԱՍՍ-ի տեղեկացմամբ՝ բաց լսումներ անցկացնելու իրավասություն ունեցող հանձնաժողովում կընդգրկվեն յոթ հանրապետականներ եւ հինգ դեմոկրատներ։
Ներկայացուցիչների պալատի նորընտիր խոսնակ Քեւին Մաքքարթին, ով հանձնաժողով ստեղծելու գաղափարի անմիջական հեղինակն է, իր ելույթում ապագայի հետ կապված ամենամեծ մտավախություններից մեկը համարել է Չինաստանից չափազանց մեծ կախվածությունը եւ դրանից սպառնացող վտանգը։ Նոր հանձնաժողովը, ամենայն հավանականությամբ, կգլխավորի Մայք Գալահերը, ով բացահայտ օգտագործում է «նոր սառը պատերազմ» արտահայտությունը։ Ի դեպ, դեկտեմբերի սկզբին «Fox News» կայքում հրապարակված համատեղ հոդվածում Մաքքարթին եւ Գալահերը նշել էին, որ «նոր սառը պատերազմում հաղթելու համար պետք է չինական ագրեսիային պատասխանեն կոշտ քաղաքականությամբ»։
Հանրապետականների նախաձեռնությունը հիմք է ստեղծում Չինաստանի նկատմամբ ԱՄՆ-ի ավելի կոշտ մոտեցման համար: Օրենսդիր մարմնի օրակարգում է նաեւ Չինաստանում ուղղակի ներդրումների ստուգման նոր մեխանիզմ ներդնելու նախագիծը, որը թույլ կտա արգելափակել անդրազգային կորպորացիաներին ներդրումներ կատարել ռազմավարական ոլորտներում։
«Financial Times»-ի Շանհայի բյուրոյի նախկին ղեկավար, այժմ Չինաստանում քաղաքական ռիսկերի վերլուծությամբ զբաղվող կենտրոնի գլխավոր տնօրեն Գաբրիել Վիլդաուի գնահատմամբ՝ Կոնգրեսի ճնշումը կարող է ազդել ամերիկյան վարչակազմի քաղաքականության վրա: Մասնավորապես, անցյալ ամիս առեւտրի դեպարտամենտը որոշում է ընդունել, որի արդյունքում «Apple»-ը դադարեցրել է YMTC չիպերը նոր iPhone-ներում օգտագործելու մտադրությունը, թեեւ ծրագրի համաձայն՝ պահանջվում էր չիպերն օգտագործել միայն Չինաստանում վաճառվող հեռախոսներում: Որոշ օրենսդիրներ ցանկանում են հատուկ պատժամիջոցներ կիրառել նաեւ Չինաստանում գործող ամերիկյան ընկերությունների նկատմամբ։ Ներկայացուցիչների պալատի ճանապարհների եւ միջոցների հանձնաժողովում, որը զբաղվում է հարկային եւ առեւտրային հարցերով, հանրապետական նոր նախագահ Ջեյսոն Սմիթը խոստացել է «ուսումնասիրել՝ արդյոք ամերիկյան ժողովրդի շահերի՞ց է բխում հարկային արտոնությունների տրամադրումն այն կորպորացիաներին, որոնք հրաժարվել են իրենց ամերիկյան ինքնությունից՝ հօգուտ Չինաստանի հետ հարաբերությունների»։ Երկու կուսակցությունների օրենսդիրները Չինաստանի հետ կապված բազմաթիվ նախագծեր են առաջարկել, որոնցից շատերը, ըստ Վիլդաուի, թեեւ օրենք չեն դառնա, սակայն մատնանշում են ԱՄՆ-ի համար Չինաստանի խնդրի առանցքային լինելը։ Այդ նախագծերի թվում ուշադրության է արժանի ԱՄՆ ռազմավարական նավթային պաշարների ակտը, որն արգելում է ԱՄՆ ռազմավարական նավթային պաշարներից նավթի արտահանումը չինական ընկերություններին:
Չին-ամերիկյան հարաբերություններում մյուս կարեւոր հարցը վերաբերում է Թայվանին։ Պեկինի հետ հարաբերությունների հիմքում առայսօր ընկած է եղել ԱՄՆ-ի կողմից վարվող «Մեկ Չինաստան» մոտեցումը, թեեւ վերջին շրջանում որոշակիորեն տուրբուլենտություն է նկատվում։ Դրա մասին է վկայում Ներկայացուցիչների պալատի նախկին խոսնակ Նենսի Փելոսի այցը Թայվան, ինչպես նաեւ նախագահ Բայդենի հայտարարությունը, որ «աննախադեպ հարձակման դեպքում» ամերիկյան զորքերը կպաշտպանեն կղզին։ Վաշինգտոնի «ռազմավարական երկիմաստության» դիրքորոշման փոխարեն հանրապետական եւ որոշ դեմոկրատական օրենսդիրներ փորձում են հասնել «ռազմավարական հստակության»։ Պետք է նշել, որ այդ մոտեցումը կարող է հանգեցնել իրավիճակի կտրուկ սրման, եւ ինչպես տեսնում ենք, կողմերը նախընտրում են հարցերը լուծել առավելապես տնտեսական մրցակցության կամ «տնտեսական պատերազմի» տրամաբանության շրջանակներում։
Միեւնույն ժամանակ ԱՄՆ-ն շարունակում է իր ռազմական ներկայությունն ամրապնդել եւ ուժեղացնել Չինաստանի շուրջ։ «Reuters»-ի տեղեկացմամբ՝ Պենտագոնը մտադիր է ուժեղացնել իր ներկայությունը Ճապոնիայի ափերի մոտ. այդ նպատակով ԱՄՆ-ն այնտեղ կուղարկի ծովային հետեւակի արդիականացված գունդ, ինչպես նաեւ կավելացնի իր նավատորմի համար հականավային հրթիռների քանակը։ Նախատեսվում է հրթիռների տեղակայումն ավարտել մինչեւ 2025 թ.։ Ամերիկացի օրենսդիրները դեկտեմբերին հավանություն տվեցին մի օրինագծի, որով նախատեսվում է մինչեւ 2027 թ. 2 միլիարդ դոլար տրամադրել Թայվանին սպառազինությունների մատակարարումը ֆինանսավորելու համար։ ԱՄՆ-ի օրենքի ընդունումից օրեր անց չինական բանակն անցկացրեց տարածաշրջանում ամենախոշոր զորավարժությունները։ ՉԺՀ-ի պետական խորհրդին առընթեր Թայվանի գործերի գրասենյակի պաշտոնական ներկայացուցիչ Մա Սյաոգուանգը երեկ հրավիրված ասուլիսի ժամանակ հայտարարել է, որ 2023 թ. Չինաստանը կշարունակի «վճռականորեն պաշտպանել ազգային ինքնիշխանությունը եւ տարածքային ամբողջականությունը, կճնշի Թայվանի անկախության կողմնակից անջատողական ուժերի սադրանքներն ու արտաքին ցանկացած միջամտություն»։
