Այս տարվա մայիսի 15-ին, ժամը 00։25-ից սկսվեց ՀԱԷԿ-ի թիվ 2 էներգաբլոկի կանգը, եւ ատոմակայանը կանգնեց ամենամյա պլանային նախազգուշական վերանորոգման (ՊՆՎ)` 141 օր տեւողությամբ, ինչը պայմանավորված է ՀԱԷԿ-ի թիվ 2 էներգաբլոկի շահագործման ժամկետի երկարացման ծրագրի ավարտական փուլի աննախադեպ մեծ ծավալի աշխատանքներով: Արդեն 15 օրից ավելի է անցել: Ի՞նչ գործ է արվել այս ժամանակահատվածում, աշխատանքներն ըստ գրաֆիկի՞ են, մատակարարումնե՞րն ինչ ընթացքում են, համավարակի վերահսկման առումով ի՞նչ վիճակ է: Այս եւ այլ հարցերի հետ կապված «ՀՀ»-ն պարզաբանումներ խնդրեց «Հայկական ատոմային էլեկտրակայան» ՓԲԸ գլխավոր տնօրենի առաջին տեղակալ- ՀԱԷԿ-ի տնօրեն Մովսես Վարդանյանից:
«Մայիսի 15-ից մինչեւ հոկտեմբերի 2-ը, երբ նախատեսված է էներգաբլոկի գործարկումը, ունենք համապատասխան գրաֆիկներ՝ օրական եւ նույնիսկ, որոշ տեղերում, ժամային կտրվածքով: Աշխատանքները երեք հերթափոխով կատարվում են, գործն ըստ պլանավորածի է, ոչ մի ուշացում չունենք, նույնիսկ ոչ մի շեղում»,-վստահեցրեց Մովսես Վարդանյանը: Ըստ նրա՝ ՀԱԷԿ-ում աշխատող արտերկրից ժամանած մասնագետների թիվն այս պահի դրությամբ 200 է՝ մասնագիտացված տարբեր ընկերությունների ներկայացուցիչներ: Մեր մասնագետներն էլ, հասկանալի է, ներգրավված են:
Ինչ վերաբերում է մատակարարումներին, ապա դրանք դեռ չեն ավարտվել: Սարքավորումների, ամենատարբեր ապրանքների մի մասը դեռ ճանապարհին է: «Խնդիր չկա՝ ոչ կազմակերպչական, ոչ տեխնիկական, այդպես էլ նախատեսված էր. եթե որեւէ աշխատանք պետք է կատարվի օգոստոսին, մատակարարումները հուլիսին կլինեն: Մատակարարումներն էլ են ըստ գրաֆիկի: Ոչ մի խոչընդոտ չկա»,-պարզաբանեց ՀԱԷԿ-ի տնօրենը: Ի դեպ, առաջիկայում կստացվի միջուկային վառելիքի առաջին խմբաքանակը՝ այս տարվա բեռնավորման համար: Որոշ ժամանակ անց կստանանք նաեւ վառելիքի հաջորդ տարվա համար անհրաժեշտ խմբաքանակը՝ որպես պահուստային պաշար. «Շուրջօրյա ռեժիմով ենք աշխատում՝ ամեն վայրկյանը հաշվի առած»:
Այս համավարակային իրավիճակն ի՞նչ պատկեր ունի. սա շատ կարեւոր հարց է հատկապես այս ոլորտում եւ այս օրերին: Մ. Վարդանյանը վստահեցրեց՝ ոչ միայն այս օրերին, այլեւ ի սկզբանե վերահսկողությունը բավականին խիստ է եղել: Նույնն է նաեւ հիմա: Արտերկրից եկած մասնագետները պատվաստված են, մեր մասնագետներն էլ են պատվաստվում: Անհանգստության կարիք չկա: Այստեղ տեղին է մեջբերել նաեւ «ՀՀ»-ի դիտարկումը. մենք համավարակի, այսպես ասենք, թեժ օրերին եղել ենք կայանում: Ժամացույցի սլաքի պես աշխատող կարգապահությունն ու վերահսկողությունը տվեցին շոշափելի արդյունքը. վիրուսը, կարելի է ասել, կայանի կողքով անցավ…
Եվ վերջում՝ մայիսի 15-ից ցայսօր ի՞նչ աշխատանքներ են տարվել: Պարզվում է՝ դրանք հիմնականում վերաբերում են ապամոնտաժման գործերին՝ այնտեղ, որտեղ պետք է արդիականացում արվի, եւ նախագծային որոշակի ճշտումներին: Իսկ, ընդհանրապես, մինչեւ հոկտեմբերի 2-ը շատ գործ կա անելու: Ինչպես ներկայացրեց ՀԱԷԿ-ի տնօրենը, ՊՆՎ-ի ընթացքում պետք է ռեակտորը հիմնանորոգվի՝ ակտիվ գոտու լրիվ բեռնաթափմամբ, ռեակտորային կայանքի վերին բլոկի խցարար մակերեւույթներն արդիականացվեն, ռեակտորի իրանի մետաղի վերահսկում պետք է արվի ոչ միայն թրծաթողումից առաջ, այլեւ՝ հետո: Միջուկային վառելիքի պահման ավազանի եւ ճնշման փոխհատուցչի նորոգում պետք է արվի, հիմնանորոգվեն շոգեգեներատորները, վերահսկվեն շոգեգեներատորների կոմպոզիտային եռակցման կարանները: Ընթացիկ կնորոգվեն թիվ 3 եւ թիվ 4 տուրբինները, միջին նորոգում կանցնի թիվ 3 գեներատորը, թիվ 4 գեներատորն էլ կհիմնանորոգվի:
Այս ՊՆՎ-2021-ը հայ եւ արտերկրի մասնագետների համագործակցության դասական օրինակ է: Արտերկրի մասնագետներից բացի ՊՆՎ-2021-ի
նախատեսվող աշխատանքներին մասնակցելու են ՀԱԷԿ-ի գրեթե բոլոր արտադրամասերի աշխատակիցները:
