ՀՀ գիտությունների ազգային ակադեմիայի նախագահությունում տեղի է ունեցել հանդիպում ՀՀ ԳԱԱ նախագահ, ակադեմիկոս Աշոտ Սաղյանի, ԳԱԱ նախագահության անդամների, գիտական կազմակերպությունների տնօրենների եւ ՀՀ կրթության, գիտության, մշակույթի եւ սպորտի նախարարության գիտության կոմիտեի նախագահ Սարգիս Հայոցյանի եւ գիտության կոմիտեի նախագահի տեղակալ Արթուր Մովսիսյանի հետ:
Քննարկվել են գիտաշխատողների աշխատավարձերի բարձրացման եւ գիտական կադրերի որակավորման անցկացման վերաբերյալ հարցեր:
Գիտության կոմիտեի նախագահ Սարգիս Հայոցյանը ներկայացրել է ՀՀ կառավարության 2021 թվականի մայիսի 13-ի «Հայաստանի Հանրապետության կառավարության 2001 թվականի նոյեմբերի 17-ի N 1121 որոշման մեջ փոփոխություններ եւ լրացումներ կատարելու մասին» 747-Լ որոշման եւ ՀՀ կառավարության 2001 թվականի հոկտեմբերի 3-ի «Հայաստանի Հանրապետության գիտական կազմակերպություններում գիտական կադրերի որակավորման կարգը եւ գնահատման չափանիշները հաստատելու մասին» N 935 որոշման հիմնական դրույթները:
Նշվել է, որ գիտաշխատողների աշխատավարձերը բարձրանալու են 2022թ. հունվարից: Այդ պատճառով գիտական կադրերի որակավորման գործընթացը պետք է ավարտին հասցվի 2021թ. հոկտեմբերին, որպեսզի պետական բյուջեում կատարվեն համապատասխան փոփոխություներ:
