Հանրապետությունում ակտիվորեն շարունակվում են թշնամու վերահսկողության տակ անցած համայնքների տեղահանված բնակիչներին ժամանակավոր կացարաններով ապահովելու նպատակով ազատ բնակֆոնդի վերանորոգման աշխատանքները:
Այս մասին «Արցախպրես»-ի թղթակցի հետ զրույցում ասել է ԱՀ Մարտունու շրջվարչակազմի աշխատակազմի քաղաքաշինության և տեղական ինքնակառավարման բաժնի վարիչ Ալեքսանդր Սաղյանը:
«Արցախի հանրապետության պետական աջակցության ծրագրով Մարտունու շրջանում իրականացվում է տեղահանված համայնքների բնակիչներին ժամանակավոր կացարանով ապահովելու գործընթացը: Ազատ բնակֆոնդի տների վերանորոգման աշխատանքների արդյունքում Սոս, Աշան, Մսմնա, Հաղորտի և Եմիշճան համայնքներում առկա են ընդհանուր 14 վերանորոգված բնակելի տներ, որոնք կարող են տրամադրվել տեղահանված համայնքների բնակիչներին»,- նշել է Ա. Սաղյանը և հավելել, որ ծրագիրն իրականացվում է նաև քաղաք Մարտունիում՝ նոր բնակելի թաղամասի, Կաղարծիում՝ 14 բնակարանանոց շենքի կառուցմամբ։ Իսկ Մուշկապատում շուրջ 15 տան վերանորոգման աշխատանքներն ավարտման փուլում են:
Ա. Սաղյանը հավելել է նաև, որ տեղահանված յուրաքանչյուր ընտանիքի, որոնք կվերաբնակեցվեն նշված համայնքներում, նվիրատուի կողմից կտրամադրվի 1֊ական կով՝ անասնապահությամբ զբաղվելուն խթանելու համար:
Մեր զրուցակցի տեղեկացմամբ՝ Մարտունու շրջանի այդ համայնքներում վերաբնակվելու համար ծրագրի շահառուները կարող են դիմել տվյալ համայնքների ղեկավարներին:
