Գեղարքունիքի մարզում գտնվող ԵԿՄ «Պատանի երկրապահ» ուսումնամարզական ճամբարում հուլիսի 17-ին տեղի ունեցած բացման հանդիսավոր արարողությանը ներկա էր նաեւ ԵԿՄ վարչության նախագահ Ս. Միքայելյանը:
«Պատանի երկրապահը» 24 տարեկան է։ Ճամբարը Գեղարքունիքի մարզում, Մարտունու տարածաշրջանում, Սեւանա լճի ափին գործում է 2008-ից։ Մինչեւ օգոստոսի վերջ այստեղ իրենց ճամբարային առօրյան են անցկացնում հազարավոր պատանիներ ու աղջիկներ ՀՀ բոլոր մարզերից եւ Արցախից։ Հուլիսի 27-ին այս տարվա երկրորդ հերթափոխն սկսվեց։ Առավոտյան մարդաշատ էր ՀՀ ԵԿՄ վարչության շենքի մոտ։ Մի քանի տասնյակ պատանիներ ու աղջիկներ մեկնեցին հանգստի։ «Արծիվ 24» ջոկատի հրամանատար Մանվել Հովսեփյանն ուղեկցում էր մի խմբի։ ԵԿՄ վարչության բակում տեղեկացրեց, թե որն է պատանի երկրապահի դերը, տեղեկություններ հայտնեց ճամբարի մասին. «Ճամբարում յուրաքանչյուր ստորաբաժանում ունի իր հրամանատարը, յուրաքանչյուր օրվա համար նախատեսված է դասացուցակ-օրակարգ՝ մոտեցված զինվորական կարգացուցակին: Օրակարգում ընդգրկված են նաեւ ուսումնական եւ հանգստի ժամեր»:
ՀՀ ԵԿՄ Երեւանի Ավանի բաժանմունքի նախագահ, ազատամարտիկ Երեմ Խաչատրյանը տեղեկացրեց՝ հերթափոխը տեւելու է 10 օր, եւ այդ օրերի ընթացքում մեր երեխաներն անցկացնելու են հիանալի ժամանակ։ Մինչ կգար ավտոբուսը, ճամբար մեկնող տղաները մարզական փորձեր կատարեցին ԵԿՄ վարչության շենքի բակի մարզասարքերի վրա։ Այսօր, քան երբեւէ, շատ է կարեւորվում նման ճամբարների դերը մեր երեխաների կյանքում։ Ինչքան էլ խաղաղություն ենք մաղթում, փորձում ենք հեռու մնալ պատերազմից, չի ստացվում։ Ունենք թշնամի հարեւաններ, ովքեր մշտապես ձգտում են տիրանալ մեր երկրին։ Եվ պատերազմից խուսափելու համար, խաղաղ երկինք ունենալու համար պետք է պատրաստ լինենք պատերազմի։ Սա նշանակում է՝ մանկուց մեր երեխաներին պետք է մարզենք, տանք հայի արժեհամակարգին հարիր դաստիարակություն, վարժեցնենք, սովորեցնենք օգտագործել զենքը։
