Պետական եկամուտների կոմիտեն հայտնում է հիփոթեքային վարկի վճարված տոկոսների չափով եկամտային հարկի գումարների վերադարձման՝ էլեկտրոնային հարթակի գործարկման մասին: 2022-ից վարկառուն բացառապես էլեկտրոնային եղանակով է ներկայացնելու եկամտային հարկի գումարի վերադարձման դիմումը, որի ձեւը սահմանված է ՊԵԿ նախագահի հրամանով։ ՊԵԿ տեղեկատվության եւ հասարակայնության հետ կապերի բաժնից տեղեկանում ենք գործընթացի մանրամասներին։
Էլեկտրոնային հարթակում վարկառուն դիմումը կլրացնի հաշված րոպեների ընթացքում, եւ, պարզվում է, դիմումի հիմնական մասը կլրացվի ինքնաշխատ` հենց համակարգի կողմից։ Բացառություն կկազմեն միայն հաշվետու ժամանակաշրջանը, վարկառուի կոնտակտային տվյալները եւ նրան պատկանող բանկային հաշվեհամարը: Այս տվյալները նա անձամբ կլրացնի դիմումը ներկայացնելու ժամանակ։ Ի դեպ, հաշվեհամարի վավերականությունը կստուգվի Կենտրոնական բանկի կողմից՝ վարկառուի համաձայնությամբ։
Դիմումն առցանց հարթակով ներկայացնելու համար վարկառուն պետք է նախապես գրանցվի «Անհատական հաշիվների տեղեկատվական պորտալ» համակարգում: Գրանցման մի քանի տարբերակներ կան։ ՊԵԿ-ը վարկառուներին ներկայացնում է այդ տարբերակները։
1. Եթե վարկառուն ունի էլեկտրոնային ստորագրություն, ապա կարող է մուտք գործել ՀՀ ՊԵԿ պաշտոնական կայքի «Էլեկտրոնային ծառայություններ» բաժնի «Անհատական հաշիվների տեղեկատվական պորտալ» ենթաբաժին եւ լրացնել անհատական հաշվին մուտքի հնարավորություն ստանալու մասին հայտը, էլեկտրոնային ստորագրությամբ ստորագրել այն եւ գրանցվել համակարգում։ Հայտը լրացնելիս պետք է գրի անունը, ազգանունը, հայրանունը, հանրային ծառայությունների համարանիշը կամ այդ համարանիշը չունենալու մասին տեղեկանքի համարը, անձը հաստատող փաստաթղթղի (անձնագիր, ծննդյան վկայական, կացության քարտ, կոնվենցիոն ճանապարհորդական փաստաթուղթ, նույնականացման քարտ, կենսաչափական անձնագիր, օտարերկյա անձնագիր՝ ՀՀ-ում աշխատանքի իրավունքով, օտարերկրյա անձնագիր) սերիան կամ համարը, էլփոստը, քաղաքային եւ բջջային հեռախոսահամարները։ Լրացված հայտի ձեւը վարկառուն պետք է ներբեռնի, դնի էլեկտրոնային ստորագրությունը եւ հետբեռնի այն համակարգ։
2. Իսկ էլեկտրոնային ստորագրության բացակայության դեպքում վարկառուն կարող է՝
ա. ՊԵԿ հարկ վճարողների սպասարկման համապատասխան բաժինների էլեկտրոնային հասցեներին (օրինակ՝ [email protected], [email protected] եւ այլն) ուղարկել դիմում՝ կցելով անձը հաստատող փաստաթուղթ, հանրային ծառայությունների համարանիշ կամ տեղեկանք` դրա բացակայության վերաբերյալ: Անհրաժեշտ է լրացնել նաեւ էլեկտրոնային փոստի հասցեն, որին էլ կուղարկվի հղում՝ «Անհատական հաշիվների տեղեկատվական պորտալ» մուտք գործելու համար՝ օգտվողի անունն ու գաղտնաբառը որոշելու նպատակով։
բ. Վարկառուն կարող է նաեւ անձամբ ներկայանալ ցանկացած սպասարկման բաժին՝ ներկայացնելով անձը հաստատող փաստաթուղթ, հանրային ծառայությունների համարանիշ կամ տեղեկանք դրա բացակայության վերաբերյալ եւ էլեկտրոնային փոստի հասցե, որին էլ կուղարկվի հղում՝ «Անհատական հաշիվների տեղեկատվական պորտալ» մուտք գործելու համար օգտվողի անունն ու գաղտնաբառը որոշելու նպատակով։
ՊԵԿ-ից տեղեկացանք նաեւ, որ հիփոթեքային վարկի պայմանագրում ներգրավված յուրաքանչյուր վարկառու, որն օգտվում է եկամտային հարկի վերադարձից, նույնպես պետք է գրանցվի «Անհատական հաշիվների տեղեկատվական պորտալ» համակարգում եւ մուտք գործի օգտվողի իր անունով ու գաղտնաբառով:
Ի դեպ, կառավարության որոշման համաձայն՝ հաշվետու եռամսյակում վարկի մարման ժամանակացույցով վճարված տոկոսների (բացառությամբ սուբսիդավորման հաշվին վճարված) գումարի մասին տեղեկանքը հարկային մարմին է ներկայացվելու ԱՔՌԱ վարկային բյուրոյի միջոցով՝ էլեկտրոնային եղանակով: Այդ նպատակով վարկառուն հիփոթեքային վարկը տրամադրած ՀՀ ռեզիդենտ ֆինանսական կազմակերպությանը պետք է տրամադրի համաձայնություն: ՊԵԿ-ը հորդորում է բոլոր վարկառուներին համաձայնությունը փաստելու նպատակով այցելել իրենց վարկը սպասարկող ֆինանսական կազմակերպություն կամ կապ հաստատել նրանց հետ:
Եվս մեկ հստակեցում անենք։ Էլեկտրոնային հարթակի ներդրման շրջանակներում հիփոթեքային վարկի վճարված տոկոսների չափով եկամտային հարկի գումարի վերադարձման ծրագրից առաջին անգամ օգտվողներն անհրաժեշտ փաստաթղթերը հարկային մարմին կներկայացնեն միայն մեկ անգամ՝ առձեռն կամ փոստով, եթե ներկայացված փաստաթղթերում փոփոխություններ չկատարվեն։ Այնուհետեւ ՊԵԿ-ի կողմից եկամտային հարկի վերադարձից օգտվելու իրավունքի հայտի հաստատումից հետո, վարկառուն «Անհատական հաշիվների տեղեկատվական պորտալում» գրանցվում եւ էլեկտրոնային դիմումն ուղարկում է ընդհանուր սահմանված կարգով: Վարկառուն, բացի էլեկտրոնային եղանակով ներկայացվող դիմումից, հարկային մարմին այլ փաստաթղթեր չի ներկայացնի:
Էլեկտրոնային հարթակի միջոցով եկամտային հարկի վերադարձի գումարները կվերադարձվեն 3 աշխատանքային օրվա ընթացքում։
