Համաշխարհային ծանրամարտի պատմությունը հարստացավ հանրագիտարանային արժեք ունեցող եւս մեկ գրքով՝ «Ծանրամարտ, օլիմպիադայից-օլիմպիադա, Ռիո Դե Ժանեյրո-Տոկիո/2016-2021 թթ.» վերնագրով: Հեղինակները Մանկավարժական գիտությունների դոկտոր, պրոֆեսոր, ՀՀ ֆիզկուլտուրայի եւ սպորտի վաստակավոր գործիչ, ՀՀ ծանրամարտի ֆեդերացիայի փոխնախագահ,15 մենագրության, 16 գրքերի եւ մեկ ուսումնական ձեռնարկի հեղինակ Վանդոս Ղարագյոզյանն է եւ նրա որդին՝ Վանաձորի ծանրամարտի ֆեդերացիայի նախագահ, Լոռվա մարզի ծանրամարտի ֆեդերացիայի փոխնախագահ, միջազգային կարգի մրցավար Հմայակ Ղարագյոզյանը:
Տեղեկացնենք, որ մինչ այս գիրքը Վ. Ղարագյոզյանը տարբեր տարիների հեղինակել է դարձյալ հանրագիտարանային նշանակության մի շարք գրքեր, որոնցում մանրամասն ներկայացվել են օլիմպիական խաղերում, աշխարհի, Եվրոպայի առաջնություններում ծանրամարտ մարզաձեւում բարձունքներ նվաճած մարզիկներն ու մարզուհիները, նրանց ցուցաբերած արդյունքները, ռեկորդներն ու ռեկորդակիրները:
Այս գրքում համառոտակի նշված է ծանրամարտի՝ որպես մարզաձեւի, կայացման, ծանրամարտի միջազգային ֆեդերացիայի ստեղծման, մարզաձեւը Եվրոպայի, աշխարհի առաջնությունների եւ օլիմպիական խաղերի ծրագրում ընդգրկելու մասին: Աշխատության մեջ ներկայացված են հայ ծանրորդ-ծանրորդուհիների արդյունքները, ովքեր մասնակցել են 2016-2021 թթ. աշխարհի, Եվրոպայի առաջնություններին եւ 32-րդ Օլիմպիական խաղերին: Հարուստ փաստական տվյալներով ակնարկ է արվում Հայաստանում եւ սփյուռքում ծանրամարտի խմբակների ստեղծման, մրցումների կազմակերպման եւ հայ ծանրորդների՝ ԽՍՀՄ 1930-1940 թթ առաջնություններին մասնակցության մասին: Նշված են նաեւ հայ ծանրորդների լավագույն արդյունքները 1946-2001 թթ Եվրոպայի, աշխարհի առաջնություններում եւ օլիմպիական խաղերում: Մանրամասն նշված են մասնակիցներն ըստ քաշային կարգերի, սեռի, տարիքի, պատվիրված քաշերը եւ մոտեցումները պոկում եւ հրում վարժություններում, երկամարտի արդյունքները, գրաված տեղերը, միավորները, նվաճած մեդալները, ինչպես նաեւ հաղթողների անուն-ազգանունները, բարձրացրած քաշերը, երկրները, Եվրոպայի, աշխարհի եւ օլիմպիական բոլոր ռեկորդները առ 01.01.2022 թ.:
Հեղինակները գիրքը սիրով նվիրել են ՌԴ վաստակավոր շինարար, Վանաձորի պատվավոր քաղաքացի Ռաֆայել եւ ՀՀ ֆիզկուլտուրայի եւ սպորտի վաստակավոր աշխատող Ալբերտ Ղարագյոզյանների անմար հիշատակին: Այն հրատարակվել է Վանաձորի պետական համալսարանի գիտական խորհրդի որոշմամբ: Նկատի է առնվել նաեւ այն հանգամանքը, որ նախատեսված է ծանրամարտի մասնագետների, դասախոսների, ուսանողների եւ ընթերցողների լայն լսարանի համար:
Գագիկ ԱՆՏՈՆՅԱՆ
