Արցախյան 44-օրյա պատերազմից հետո թշնամու տիրապետության տակ անցավ նաեւ Քաշաթաղի ողջ շրջանը, եւ մոտ 3000 ընտանիք ստիպված տեղափոխվեց ՀՀ մարզեր, Երեւան, Արցախի այլ շրջաններ: Տեղահանված ընտանիքների բնակարանային պայմանների բարելավման նպատակով ՀՀ կառավարության կողմից անցած տարվա հոկտեմբեր-նոյեմբեր ամիսներին հատկացվել են հավաստագրեր՝ յուրաքանչյուրը 10 միլիոն դրամի չափով: Սակայն հատկացման պայմանները, նաեւ դրամի չափը հնարավորություն գրեթե չեն տալիս, որ ձեռք բերվի բնակարան, այն դեպքում, երբ նույն ընտանիքների մեծ մասն արդեն 30 ամիս տարբեր վայրերում ապրում է վարձով, մի փոքր մասը՝ բարեկամ-հարազատների տներում, կան նաեւ ընտանիքներ, որ բնակվում են պետական կամ անհատական տարածքներում եւ այլ պայմաններում: Պետության կողմից հատկացված հավաստագիրն ունի ժամկետ՝ 1 տարվա ընթացքում պետք է օգտագործվի: Սակայն, ինչպես նշեցինք, պայմանները մտահոգիչ են, չեն համապատասխանում շահառուների շահերին: Ծրագրով նախատեսած է նաեւ շահագրգռել, որ տուն-բնակարան գնվի մարզերում, այդ պատճառով Երեւանում տուն գնելու համար տրամադրվում է 2 մլն-ով պակաս, իսկ սահմանամերձ տարածքներում գումարն ավելացվելու է: Արդեն կես տարի անցել է, եւ շահառուների ընդամենը 10 տոկոսը, հնարավոր է՝ մի փոքր ավելին են կարողացել բնակարան-տուն գնել: Հիմնականում օգտագործվել է 2 հավաստագիր՝ 20 մլն դրամ, երբ հարազատները միավորվել են: Որոշները, բացի հավաստագրի գումարից, ավելի գումար են ներդրել՝ հիփոթեքային կամ այլ կարգի վարկ վերցնելով… Կան ընտանիքներ, որ ցանկանում են հողատարածք գնել եւ այդ հողի վրա կառուցել իրենց տունը, սակայն ծրագրով հող չի կարելի գնել: Կա շինարարություն իրականացնելու հնարավորություն, սակայն միայն հող ունենալու դեպքում: Այս պատճառով էր, որ մարտի 30-ին քաշաթաղցիները հերթական անգամ հավաքվել էին ՀՀ կառավարության մոտ՝ պահանջելով հանդիպում կառավարության ղեկավարների հետ: Նախօրոք կառավարություն է ներկայացվել նամակ, որում նշված են, թե ինչ փոփոխություններ պետք է արվեն Արցախի առանձին շրջաններից տեղահանված ընտանիքների համար բնակարանային մատչելիության ապահովման պետական աջակցության ծրագրում: Ընթացքում տեղեկացվեց՝ հարցը կքննարկվի մեկ շաբաթվա ընթացքում, եւ կլինի հանդիպում շահառուների ներկայացուցիչների եւ փոխվարչապետ Մհեր Գրիգորյանի աշխատակազմի ղեկավարի հետ: Խմբի մեջ այս անգամ ներգրավվելու է ներկայացուցիչ նաեւ Քարվաճառից: Կառավարության շենքի դիմաց հավաքված քաշաթաղցիները, ովքեր փորձել են օգտվել հատկացված հավաստագրերով տուն ձեռք բերելու հնարավորությունից, տեղեկացրին, հանդիպել են լուրջ խնդիրների. նախ՝ բանկերի կողմից, որոնք պետք է հատկացնեն վարկ՝ տուն-բնակարան գնելու համար: Առավել խոցելի պայմաններում են հայտնվել վարկային ոչ լավ պատմություն ունեցողները, 53 տարեկանից բարձր անձինք: Բացի այդ, վաճառվող տուն-բնակարանը գնահատվում է բանկի ներկայացուցիչների կողմից եւ հիմնականում՝ գնից ցածր: Բոլորն էլ նշեցին՝ եթե բանկի վարկը մարվելու է կառավարության կողմից, ինչո՞ւ են բանկերը վարկ տրամադրում կամ չեն տրամադրում՝ հաշվի առնելով շահառուի վարկային պատմությունը, տարիքը եւ այլ պայմաններ: Նշեմ նաեւ՝ վերջին շրջանում ՀՀ մարզերում գրեթե կրկնակի թանկացել է անշարժ գույքը: Բացի այդ, որոշ վաճառողներ էլ, երբ տեղեկանում են, որ հավաստագրով է լինելու առքուվաճառքը, որ հնարավոր է՝ որոշ ժամանակ ձգձգվի՝ կապված թղթավարության հետ, հրաժարվում են գործարք կնքելուց:
Հուսանք՝ տեղահանվածներին օժանդակող որեւէ նոր որոշում կլինի ՀՀ կառավարության կողմից:
