Երեւանի Ավետիք Իսահակյանի անվան կենտրոնական գրադարանում կայացած հայ-իսպանական բարեկամությանը նվիրված միջոցառումից հետո, որին հրավիրված էր նախաձեռնության համահեղինակ, Իսպանիայի «Արարատ» հայկական միության նախագահ Արարատ Ղուկասյանը, մայրաքաղաքի երկու դպրոցների տնօրինություններ հրավիրել էին իսպանահայ հասարակական գործչին իրենց կրթօջախներ։ Հրավերներ, որոնք Ա. Ղուկասյանը մեծ սիրով էր ընդունել։
Առաջին այցելությունը կատարվեց Երեւանի թիվ 159 ավագ դպրոց, որի աշակերտների եւ ուսուցիչների հետ արդեն իսկ հանդիպել էր նախորդ ուսումնական տարում, երբ դպրոցի նախաձեռնությամբ տեղի ունեցավ Արարատ Ղուկասյանի «Փնտրտուքների ճանապարհին» բանաստեղծությունների ժողովածուի առցանց շնորհանդեսը։ Երկուստեք տպավորված լինելով միջոցառումից` հանդիպման մասնակիցները խոստացան շուտով նաեւ կենդանի հանդիպում կազմակերպել, որն էլ շատ սպասեցնել չտվեց։ Դպրոցի ուսուցիչներն ու աշակերտները, ՄԿԱԳ-ի տնօրենի տեղակալ, հայոց լեզվի եւ գրականության ուսուցչուհի Գոհար Խաչատրյանի գլխավորությամբ, նախ այցելեցին գրադարան՝ մասնակցելու վերոհիշյալ միջոցառմանը, ապա ընդունեցին իսպանաբնակ հայ գրողին արդեն դպրոցում։
Հանդիպման ընթացքում աշակերտները սիրով ընթերցեցին հեղինակի՝ իրենց կողմից ընտրված ստեղծագործություններ, հարցեր ուղղեցին բանաստեղծ-գործչին՝ արդյունքում բացահայտելով նրա հայրենասեր եւ ազգանվեր կերպարը։ Իսկ Ա. Ղուկասյանն աշակերտներին պատգամեց ոչ մի պարագայում չլքել հայրենիքը, ապրել ու գործել մայր հողում՝ հույս հայտնելով, որ մի օր ինքն էլ կվերադառնա եւ կմիանա նրանց։ Հանդիպման վերջում դպրոցի տնօրեն Զարինե Ղազարյանը բանաստեղծին գրքեր նվիրեց` Վալենսիայի հայկական գրադարանի համար։
Հաջորդ հանդիպումը Երեւանի թիվ 163 դպրոցում էր, որտեղ նույնպես նախկինում հանդիպում տեղի էր ունեցել իսպանաբնակ հեղինակի հետ` վերջինիս գրքի շնորհանդեսի կապակցությամբ։ Այս անգամ Ղուկասյանի՝ հայրենիք այցի մասին տեղեկանալով` դպրոցի ուսուցչուհի Քրիստինե Ներսիսյանը, առիթը բաց չթողնելով, հրավիրել էր նրան կրթօջախ, որն էլ բանաստեղծը մեծ սիրով ընդունել էր։ Այստեղ իսպանաբնակ հայի համար նախատեսված անակնկալները շատ էին. նախ նրան տեղեկացրին, որ պետք է մասնակցի Էրեբունի-Երեւանի տոնին նվիրված վիկտորինա-մրցույթին, ապա նաեւ, որ այդ մրցույթում պետք է հանդես գա որպես ժյուրիի անդամ։ Այս անակնկալն ավելի քան պարտավորեցնող էր, այդուհանդերձ, Ա. Ղուկասյանը սիրով ընդունեց այն։
Երեւանի 2804-ամյակին նվիրված «Սիրո հավերժ քաղաք» խորագիրը կրող խաղ-վիկտորինան սկսվեց Երեւանի օրհներգով` 5բ դասարանի երեխաների կատարմամբ (ուսուցչուհի՝ Տաթեւ Բեգլարյան): Նախքան խաղն սկսելը դպրոցի տնօրեն Անի Դանիելյանը ներկայացրեց մասնակիցներին, նրանց թվում նաեւ հյուրին, որին հենց այդ ժամանակ էլ նվիրեցին դպրոցի աշակերտներ Մառա Գալյանի (6-րդ դաս.) եւ Քեթրին Դաթոյանի (8-րդ դաս.) պատրաստած կտավները։ Այնուհետեւ տնօրենը, դպրոցի անունից, Ա. Ղուկասյանին նվիրեց անվանական գրիչ, որին էլ հետեւեց 8-րդ դասարանի աշակերտուհի Դոնարա Կոլյանի «Երեւան» բանաստեղծության ասմունքը` ամբողջացնելով օրվա խորհուրդը։ Աշակերտական խորհրդի համանախագահներ Նարեկ Գասպարյանը եւ Ֆլորանս Սաֆարյանը ներկայացրին ժյուրիի անդամներին՝ Անի Դանիելյան (տնօրեն, պատմաբան), Ծովինար Խասապետյան (ուսուցչուհի, աշխարհագրագետ), Անի Հակոբյան (ուսումնական գծով տնօրենի տեղակալ, հոգեբան, սոցիոլոգ) եւ, ինչպես արդեն նշվեց, Արարատ Ղուկասյան։
Մրցույթին բավական լավ պատրաստված երկու թիմերը` «Բիայնան» եւ «Ալֆան», ցուցադրեցին իրենց բարձր գիտելիքները Հայաստանի եւ համայն հայության մայրաքաղաք Երեւանի մասին։ Խաղի ավարտին Անի Դանիելյանը շնորհակալական եւ դրվատանքի խոսքեր ուղղեց աշակերտներին, ուսուցիչներին եւ կազմակերպիչներին։ Այդ խոսքերին միացավ նաեւ հյուրը` Արարատ Ղուկասյանը, ով բարձր գնահատեց ուսուցիչների աշխատանքն ու աշակերտների հմտությունները` խոստանալով, որ այսուհետ էլ ավելի պիտի սերտանա Վալենսիայի հայկական կիրակնօրյա եւ Երեւանի թիվ 163 դպրոցների կապը։
Այդ կապի խթանման համար աննախադեպ էր նաեւ դպրոցի աշակերտների մտահղացումը` նամակներ հղել Վալենսիայի հայկական դպրոցի իրենց հասակակից աշակերտներին, որոնք էլ Արարատ Ղուկասյանը մեծ սիրով տարավ իր հետ Իսպանիա` հաջորդիվ դրանք իրենց հասցեատերերին հանձնելու նպատակով։ Ահա նման բազմաբնույթ եւ հարուստ զգացողություններով է մեր հայրենակիցը հեռանում հայրենիքից` մի օր անպայման վերադառնալու ակնկալիքով։
Արթուր ՂՈՒԿԱՍՅԱՆ
