Հավատարիմ ազգային արժեքներին

Համավարակի պարտադրած կանոնների պատճառով Ամանորի հանդեսը Վալենսիայի հայկական կիրակնօրյա դպրոցում այս անգամ սպասվածից ավելի ուշ տեղի ունեցավ։

Մեր կրթօջախն այստեղ գրեթե 20-ամյա պատմություն ունի։ Նրա բացումը «Արարատ» միության նախագահ Ա. Ղուկասյանը վալենսիական Միսլատայի ռեստորաններից մեկում էր կատարել, ուր մի քանի երեխաներ էին շտապում՝ հաստատության ընդմիջման ժամին հայերենի դասեր ստանալու նպատակով։ Հետագայում, երբ վերոհիշյալ ազգային կազմակերպությունը պաշտոնապես արդեն գրանցվեց Վալենսիայում, սոցիալական ծառայության տնօրինությունն ընդառաջ գնալով «Արարատի» խնդրագրին՝ սենյակ հատկացրեց, որը ծառայում էր որպես հայոց լեզվի, գրականության, պատմության եւ մշակույթի ուսուցման լսարան։ Անցած շրջանը բավարար էր ոչ միայն հետեւողականորեն ինքնության պահպանման համար անհրաժեշտ աշխատանքներ կատարելու, այլեւ յուրաքանչյուր ուսումնական տարվա ընթացքում տարբեր առիթներով մի քանի նման միջոցառում-ներկայացումների անցկացման իմաստով։

Բոլորն էլ հիշարժան էին, ամենից շատ, այդուհանդերձ, խոսվել է «Քաջ Նազարի» եւ «Սուտասանի» մասին։ Նման միջոցառումներին, սովորաբար, հետեւում է նվերների եւ պարգեւների հանձնումը՝ այդ թվում նաեւ տեղական ինքնակառավարման մարմինների պաշտոնյաների կողմից։ Խրախուսվում են նաեւ հայ ժողովրդի իսպանացի բարեկամները, ինչն իր հերթին նպաստում է, որ այդ անհատների հայասիրությամբ աչքի ընկած գործունեությունը ոչ թե պարբերական, այլ մշտական բնույթ կրի։ Ինչպես առհասարակ միությունը, այնպես էլ դպրոցը համագործակցություն են հաստատել տեղի եւ սփյուռքի տարբեր օջախների,  հաստատությունների հետ։

Իսկ այժմ դասերն ընթանում են իսպանական դպրոցում՝ հետքովիդյան այս շրջանում ենթարկվելով անխուսափելի փոփոխությունների ու սահմանափակումների։ Ինչ վերաբերում է Ամանորի հանդեսին, ապա այն իրականացվել է ուսուցիչներ Արարատ Ղուկասյանի, Աստղիկ Սաղաթելյանի, Աննա Սանասարյանի, երեխաների եւ նրանց ծնողների համատեղ ջանքերի շնորհիվ։ Հայկական երգերը, մանկական բանաստեղծությունները, հայերեն խոսող Ձմեռ պապն ու նրա բերած նվերները, տանը պատրաստսծ եւ խնջույքին հրամցված մեր ավանդական անուշեղենները, բարձր ու զվարթ տրամադրությունը հաճելի անակնկալներ մատուցեցին, ինչը թե՛ փոքրերը եւ թե՛ ավագները շատ երկար կհիշեն։

 Արթուր ՂՈՒԿԱՍՅԱՆ