«Մարտեր առանց կանոնների» (MMA) պրոֆեսիոնալ մարզիկ Վարշամ Գեւորգյանը հունիսի 25-ին Ղազախստանում կմենամարտի ադրբեջանցի Էլմար Իբրահիմովի հետ: «Արմենպրեսի» մամուլի կենտրոնում լրագրողների հետ հանդիպման ժամանակ մենամարտին անդրադարձել են Գեւորգյանի թիմի ներկայացուցիչները:
«Հունիսի 25-ին կարիերայի ամենակարեւոր մենամարտն է լինելու: Ամեն ինչ անելու եմ հաղթանակի համար: Ինձ համար նա սովորական մրցակից է, ինչպես բոլորը: Ամեն օր նամակներ եմ ստանում նրանցից սպառնալիքներով: Նրանց չի հաջողվի ինձ կոտրել»,- ասել է Վարշամ Գեւորգյանը: Վերջինիս խոսքով` հիմա շատ ասելիք չկա, ամեն հարցի պատասխան կտրվի մենամարտից հետո:
Գեւորգյանի մարզիչ Արմեն Սողոյանի խոսքերով` Վարշամին ոչինչ պետք չէ, բացի Ալմաթիում հայ երկրպագուների աջակցությունից: «Գեւորգյանի դեմ մենամարտի հայտը ներկայացրել են իրենք: Մենք չենք հրաժարվել եւ մասնակցելու ենք: Խնդրում եմ ղազախական հայկական համայնքին, որ աջակցեն մեզ: Ցավոք, մենամարտը փակ կլինի, եւ մարզասերները կարող են հավաքվել մարզադահլիճի շրջակայքում: Վարշամը մենամարտելու է 61 կգ քաշային կարգում: Վստահ եմ, որ հաղթելու է, քանի որ պատերազմում զոհված մեր եղբայրների ոգին նրա հետ է լինելու»,-նշել է Գեւորգյանի մարզիչ-մարտավկա Արմեն Սողոյանը:
Այս օրերին Գեւորգյանը մարզումային մենամարտեր է անցկացնում Նարեկ Ավագյանի հետ, որը եւս MMA մարզիկ է: «Մոտ երեք ամիս է, ինչ պատրաստվում ենք այս մենամարտին: Շատ լավ ուսումնասիրել ենք մրցակցիս, գիտենք, ով է, ինչ է: Բացի ինձնից մի շարք մարդիկ աշխատում են Գեւորգի հետ: Ամեն հնարավորը եւ անհնարինն արել ենք այս մենամարտը լավագույնս անցկացնելու համար»,- ասել է Ավագյանը:
UFC լավագույն 15 մարզիկներից Արման Ծառուկյանն այս օրերին եւս մարզումներ է անցկացնում Վարշամ Գեւորգյանի հետ: «Վարշամին սովորեցնում եմ իմ տեխնիկական հնարքները: Նա լավ արդյունքներ է գրանցում: Գիտեմ, որ ադրբեջանցու դեմ մենամարտը շահելու է, քանի որ նա ուժեղ մարզիկ է: Տակտիկապես նա պատրաստ է եւ միայն պետք է գոտեմարտին հանգիստ մոտենա»,- ասել է Ծառուկյանը:
