«Արվեստագետ» կրթամշակութային ՀԿ-ի նախագահ Իվան Անտոնյանի եւ խմբագրական խորհրդի նախաձեռնությամբ լույս է տեսել «Արվեստագետ» կրթամշակութային հանդեսի 19-րդ համարը, որը նվիրված է ՀՀ պայծառահիշատակ վարչապետ, ՀՀ պաշտպանության առաջին նախարար, ՀՀ ազգային հերոս, Արցախի հերոս, տաղանդավոր գրող Վազգեն Սարգսյանին: «Արձակագիր սպարապետը» վերտառությամբ հանդեսում տեղ են գտել Վազգեն Սարգսյանի ուսանելի, փառահեղ կենսագրական անդրադարձներ, սպարապետի խրատական, հայրենասիրական ստեղծագործությունների մի քանի գրվածքներ…
Վազգեն Սարգսյան քաղաքական գործչի, մտավորականի անզուգական կերպարի մասին բնորոշիչ, վերլուծական խոսքեր են ասել ՀՀ վարչապետ Նիկոլ Փաշինյանը, ՀՀ նախկին նախագահները, նախարարներ, ամենայն հայոց կաթողիկոսներ, ՀՀ ժողովրդական արտիստներ, կրթական, մշակութային անվանի գործիչներ, ընտանիքի անդամները, ընկերները, ՀՀ ԱԺ նախկին ու ներկա պատգամավորներ: Հանդեսի՝ Վազգեն Սարգսյանին նվիրված էջերը կերտել են սպարապետի ուսանելի կերպարը, որը կարող է ուղեցույց դառնալ հատկապես երիտասարդ ու եկող սերունդների համար:
Հանդեսի շարունակվող՝ «Պաշտոնական» խորագրի տակ տպագրվել են ՀՀ նախագահ Վահագն Խաչատուրյանի շնորհավորական խոսքը՝ ուսուցիչներին, գլխավոր խմբագիր Իվան Անտոնյանի շնորհավորական խոսքը ՀՀ ԿԳՄՍ նախարար Ժաննա Անդրեասյանին՝ պատասխանատու պաշտոնին նշանակվելու առթիվ, եւ այլ նյութեր՝ ներկայացվող արվեստի, մշակույթի մարդկանց:
Հանդեսի կարեւորության ու նոր համարը Վազգեն Սարգսյանին նվիրելու առթիվ հարյուրավոր շնորհավորական ու ոգեւորիչ խոսքեր են ամրագրվել համացանցում՝ աշխարհի տարբեր կողմերից, որոնցից ներկայացնենք ՀՀ պաշտպանության նախարարի խորհրդական, գնդապետ, սպարապետի մարտական ընկեր Ռազմիկ Պետրոսյանի խոսքը. «Հերոսներին գնահատել եւ մեծարել կարող են միայն հերոսները: Շնորհակալություն եմ հայտնում իմ եղբայր Իվան Անտոնյանին եւ «Արվեստագետ» հանդեսի ողջ անձնակազմին՝ իրենց ազգանվեր առաքելության համար»:
Հանդեսն ամփոփվել է «Արվեստագետ» ՀԿ-ի, «Ֆորտունա» հեռուստաընկերությամբ հեռարձակվող՝ Իվան Անտոնյանի հեղինակային «Լոռու արվեստագետներ» ֆիլմաշարի կազմակերպած ազգապահպան միջոցառումների եւ հանրային, մարզային հեռուստաընկերությունների հրավերների, հարցազրույցների գունավոր, արժեքավոր լուսանկարներով:
