Նորկտակարանային ամենահայտնի մարգարեությունը, որ հայտնի է անգամ բացարձակ անհավատ մարդկանց, հակաքրիստոսի մասին մարգարեությունն է, ով կմիավորի իր իշխանության ներքո բոլոր երկրային պետությունները եւ կանի ամեն ինչ, որպեսզի մարդիկ մոռանան Քրիստոսի մասին։ Մարդկանց ձեռքերի եւ ճակատների վրա հատուկ դաջվածք է արվելու, որից հետո մարդն այլեւս չի կարող կանչել Տիրոջը եւ փրկվել։ Աստծո անվան փոխարեն մարդը կրելու է գազանի անունը՝ խորհրդավոր ու վախեցնող երեք վեցերը.
«Եւ տեսայ ծովիցը մի գազան դուրս գալիս, որ եօթը գլուխ ունէր եւ տասը եղջիւր, եւ նորա եղջիւրների վերայ տասը թագ, եւ նորա գլուխների վերայ հայհոյութեան անուն։ Եւ այն գազանը, որ տեսայ ինձու նման էր, եւ նորա ոտները արջի ոտների նման, եւ նորա բերանն առիւծի բերանի նման. եւ վիշապը տուաւ նորան իր զօրութիւնը եւ իր աթոռը եւ մեծ իշխանութիւն»։ Հայտնություն 13։1-3
«Եւ ես տեսայ մի ուրիշ գազան դուրս գալիս երկրիցը, եւ երկու եղջիւր ունէր գառի նման. բայց խօսում էր վիշապի նման։ Եւ այն առաջի գազանի բոլոր իշխանութիւնը բանեցնում էր նորա առաջին. եւ այնպես էր անում, որ երկիրը եւ նորա վերայ բնակուողները երկրպագեն այն առաջի գազանին, որի մահի վէրքը ողջացել էր։ Եւ մեծ նշաններ է անում, որ երկնքիցը կրակ էլ է վայր բերել տալիս երկրի վերայ մարդկանց առաջին»։ Հայտնություն 13։11-13
«Եւ ստիպում է ամենին՝ փոքրերին եւ մեծամեծներին, հարուստներին եւ աղքատներին, ազատներին եւ ծառաներին, որ նորանց դրոշմ տայ նորանց աջ ձեռքումը կամ նորանց ճակատումը։ Եւ որ ոչ ով չկարողանայ գնել կամ ծախել բացի նորանից, որ գազանի դրոշմը կամ նորա անունն ունի կամ նորա անունի համարը։ Այստեղ է իմաստութիւնը. ով որ միտք ունի թող գազանի թիւը համարէ. որ մարդի թիւ է, եւ նորա թիւը վեց հարիւր վաթսունեւ վեց է»։ Հայտնություն 13:16-18
Ողջ Հայտնության գիրքը պարուրված է խորհրդավորությամբ. այլաբանություններն ու խորհրդանիշներն ավելի շատ են, քան բացահայտ մարգարեությունները։ Թե ինչպես պետք է գազանի թիվը դաջվի մարդկանց աջ ձեռքին եւ ճակատին, մինչ օրս բանավեճերի թեմա է. արդյոք թանաքայի՞ն դաջվածքի մասին է խոսքը, թե՞ համընդհանուր չիպավորման։ Մինչեւ վերջերս որոշ հավատացյալներ փորձում էին «հակաքրիստոսի կնիքը» տեսնել հարկային անհատական համարներում, շտրիխ կոդերում, էլեկտրոնային անձնագրերում…
Դրա համար հարկավոր է պարզաբանել, թե իրականում ինչի մասին է Հովհաննես ավետարանիչի մարգարեությունը եւ որտեղից են մեր ենթադրությունները։ Դուք լսել եք, որ կգա հակաքրիստոսը, բայց հիմա հայտնվել են շատ հակաքրիստոսներ.
«Որդեակներ, վերջի ժամանակն է, եւ ինչպէս լսեցիք, թէ Նեռը գալիս է, եւ այժմ շատ նեռեր են եղել, որ սորանից իմանում ենք թէ վերջի ժամանակն է»։ Ա Հովհաննես 2։18
Այնուհետեւ Հովհաննես ավետարանիչը հստակեցնում է.
«Ո՞վ է ստախօսը, եթէ ոչ նա, որ ուրանում է թէ Յիսուսը չէ Քրիստոսը. նա Նեռն է, որ ուրանում է Հօրը եւ Որդուն»։ Ա Հովհաննես 2։22
Անահիտ ԲԱՆՈՒՉՅԱՆ
