Վերջերս «Բլից» թերթում հրապարակվեց «Այփսոս» (Ipsos) հետազոտական ընկերության՝ Սերբիայում անցկացրած հարցումների արդյունքը, որի համաձայն՝ մասնակիցների 44 տոկոսը դեմ է ԵՄ-ին անդամակցությանը, իսկ 35 տոկոսը՝ կողմ։ 2009-ից ի վեր (սույն տարում Սերբիան ԵՄ-ին անդամակցելու դիմում ներկայացրեց) առաջին անգամ է, որ դեմ արտահայտվողների թիվը գերազանցում է կողմ արտահայտվողների թվին: Սրան հակառակ` սերբ քաղաքագետները թերահավատորեն են մոտենում հարցման արդյունքներին: Նրանք կարծում են, որ նման հետազոտություն կատարվել է, որպեսզի ուսումնասիրեն այն սցենարը, եթե Սերբիայի կառավարությունը որոշում կայացնի՝ միանալու Ռուսաստանի դեմ միջազգային պատժամիջոցներին: Այնուամենայնիվ, փաստ է, որ սերբերի շրջանում ԵՄ-ին միանալու նախկին ոգեւորությունը նվազել է:
Ինչո՞ւ նման արդյունքներ ստացվեցին:
Սերբիան կողմ է քվեարկել ՄԱԿ-ի երեք բանաձեւերին, որոնք դատապարտում են Ռուսաստանի ագրեսիան Ուկրաինայի դեմ, սակայն չի միացել Մոսկվայի դեմ միջազգային պատժամիջոցներին: Ուստի, չնայած սերբերը ձգտում են միանալ ԵՄ-ին, Բելգրադը նաեւ «նայում է» Մոսկվայի կողմը: Դա տեղի ունեցավ այն ժամանակ, երբ Սերբիայի ներքին գործերի նախարար Ալեքսանդր Վուլինը հայտարարեց, որ երկիրը պետք է վերանայի ԵՄ-ին անդամակցելու իր որոշումը, քանի որ Արեւմուտքը պարբերաբար ճնշում է գործադրում Սերբիայի վրա Ռուսաստանի դեմ միջազգային պատժամիջոցներին միանալու հարցում:
«Նրանք Եվրոպայի հանդեպ մեր սերը չափում են Ռուսաստանի հանդեպ մեր ատելությամբ,-ասել է Վուլինը հանրային հեռարձակման ժամանակ։-Այսինքն՝ եթե սիրում ես Եվրոպան, պետք է ատես Ռուսաստանը։ Բայց մենք չենք ուզում ատել, մենք չենք ուզում մասնակից դառնալ կոնֆլիկտներին: Մենք չենք ուզում կորցնել որեւէ մեկին»:
Հատկանշական է, որ Թուրքիան եւս չի միացել Ռուսաստանի դեմ միջազգային պատժամիջոցներին, սակայն Արեւմուտքն անգամ թեթեւակի չի ստիպում նրան՝ միանալու դրանց: Հավանաբար, Թուրքիայի սպառնալիքները` ուղղված Արեւմուտքին, դեռեւս աշխատում են, իսկ ի՞նչ ունի սպառնալու Սերբիան…
