Ուկրաինական ճգնաժամն իր մութ ստվերն է տարածում Լեհաստանում ու Հունգարիայում: Այս երկրներում հասարակությունն ու քաղաքական էլիտան բաժանվել են երկու մասի. նրանք, ովքեր խստորեն քննադատում են Ռուսաստանի գործողությունները, եւ նրանք, ովքեր աջակցում են Ուկրաինային:
Լեհաստանում այնքան է սրվել բացասական վերաբերմունքը Ռուսաստանի հանդեպ, որ նվաստացում են համարում ռուսերենի գործածումը: Լեհերն իրենց ուղղված ռուսերեն հարցին չեն պատասխանում: Սակայն վերջերս Լեհաստանում մեծ թվով բողոքի ցույցեր են տեղի ունենում: Դրա պատճառն այն է, որ Վարշավայում վառելիքի գները հասել են ռեկորդային բարձր մակարդակի, ինչը պայմանավորված է Ռուսաստանի դեմ ԵՄ-ի պատժամիջոցներով: Լեհական Բյելսկո-Բիալա քաղաքում մի խումբ վարորդներ իրենց մեքենաները կայանել էին բենզալցակայանների ու գազալցակայանների մուտքերի դիմաց, որոնք պատկանում են «PKN Orlen» վառելիքի կորպորացիային: Լեհաստանն այժմ վերանայում է իր քաղաքականությունը` մեղմացնելու իրավիճակը:
Ի տարբերություն Լեհաստանի` Հունգարիան մեղմ դիրքորոշում ունի Ռուսաստանի նկատմամբ: Ավելին` Բուդապեշտն առարկել է, որ Ռուսաստանի ուղղափառ եկեղեցու առաջնորդը եւս ընդգրկվի ԵՄ պատժամիջոցների անվանացանկում: Սա Հունգարիայի քաղաքական հաղթանակն էր: Բրյուսելն իր հերթին պնդում է, որ պատրիարքը սատարում եւ խրախուսում է Ռուսաստանի ռազմական գործողությունները:
Ի դեպ, պատժամիջոցների նոր փաթեթը, որը ներառում է ռուսական նավթի ներկրման մասնակի արգելք, ստացավ ԵՄ առաջնորդների քաղաքական աջակցությունը` դեսպաններին թողնելով տեխնիկական մանրամասների շուրջ բանակցությունները եւ աշխատանքների ավարտական փուլը: Հունգարիայի ներկայացուցիչն ասել է, որ պատժամիջոցների փաթեթներն ավելի շատ են, քան ստեղծված իրավիճակը հաղթահարելու՝ ԵՄ-ի առաջարկած լուծումները:
Այսպիսով՝ Արեւելյան Եվրոպայի երկրները` ի դեմս Հունգարիայի ու Լեհաստանի, փորձում են պաշտպանել իրենց տնտեսությունները, քանի որ գիտակցում են՝ Ռուսաստանի դեմ պատժամիջոցների նոր փաթեթը բացասական մեծ ազդեցություն կարող է ունենալ: Ուստի հասարակական բողոքի ալիքը, գուցե, անզսպելի կլինի:
Հետեւենք իրադարձությունների զարգացումներին…
