Ի՞նչ պահանջներ են սահմանված երշիկեղենի մակնշման համար, ինչո՞վ պետք է առաջնորդվի սպառողը երշիկեղեն ձեռք բերելիս մոլորեցումից խուսափելու համար, ինչպե՞ս հասկանա, թե իրականում ինչ կարգի երշիկեղեն է ձեռք բերում։ Եվ եթե տնտեսավարողի կողմից եղել է իրավախախտում, ապա ի՞նչ է սպասվում նրան այդ պարագայում։
Այս եւ այլ հարցերի պատասխաններ սպառողը կարող է ստանալ Մրցակցության պաշտպանության հանձնաժողովի պատրաստած շնորհանդեսից, որում ներկայացված են երշիկեղենի արտադրության եւ իրացման գործընթացում հասարակության մոլորեցմամբ անբարեխիղճ մրցակցության դրսեւորումները։
Ի դեպ, ներկայացված քայլերին հետեւելիս սպառողը շատ հեշտ կարող է կողմնորոշվել երշիկեղեն գնելիս։ Առաջին քայլը վերաբերում է նրան, թե արդյո՞ք երշիկեղենի անվանման մեջ կամ անվանմանը կից մակնշում կա վերջինիս խմբի (մսային, միս պարունակող եւ այլն) եւ տեսակի (երշիկեղեն, կիսապատրաստվածք եւ այլն) վերաբերյալ։ Եթե երշիկեղենի փաթեթվածքի վրա մակնշված է մսային, ապա վերջինիս բաղադրամասում մսային բաղադրամասերի զանգվածային բաժինը չի կարող 60 տոկոսից պակաս լինել։ Օրինակ է բերվում կիսաապխտած երշիկ «Կրակովյանը», խումբը՝ մսային, խոզի միսը՝ 40, տավարինը՝ 20, հավինը՝ 10 տոկոս, եւ 5 տոկոս խոզաճարպը։ Մսի զանգվածային բաժինը 75 տոկոս է։ Իսկ եթե երշիկեղենի փաթեթվածքի վրա մակնշված է միս պարունակող, ապա մսային բաղադրամասերի զանգվածային բաժինը պետք է կազմի 5-60 տոկոս (ներառյալ)։
Մրցակցության պաշտպանության հանձնաժողովը նաեւ երշիկեղենի խմբի եւ տեսակի մակնշման ճիշտ ու սխալ օրինակներ է բերում։ Ասենք՝ արտադրանքի վրա նշված է «եփած երշիկ», եւ ուրիշ ոչինչ։ Սա համարվում է սխալ մակնշում, որովհետեւ տեղեկություն կա մսամթերքի տեսակի մասին՝ եփած երշիկ, բայց տեղեկություն չկա դրա խմբի մասին՝ մսայի՞ն է, թե՞ միս պարւնակող եւ այլն։ Իսկ ճիշտ մակնշում է համարվում, եթե նշված է մսամթերքի խումբը՝ մսային պաղեցված եւ տեսակը՝ երշիկ հում-ապխտած։
Գանք երկրորդ քայլին. արդյո՞ք երշիկեղենի փաթեթվածքի վրա մակնշվում է սննդամթերքի բաղադրությունը եւ ի՞նչ կարգով։ Փաթեթվածքի վրա անպայման պետք է մակնշվի բաղադրությունը, օրինակ՝ հավի միս, խոզաճարպ, կարտոֆիլի օսլա, կերակրի աղ եւն։ Բաղադրիչներն էլ պետք է նշվեն սննդամթերքի արտադրման պահի դրությամբ դրանց զանգվածային մասի նվազման կարգով։
Կարեւոր տեղեկություն տանք սպառողներին. չի թույլատրվում ընդհանուր կիրառման մսամթերքը մակնշել՝ գործածելով այնպիսի հորինված անվանումներ, որոնք ասոցացվում են մանկական սննդի համար նախատեսված մսամթերքի հետ (նրբերշիկ «Դետսկիե», երշիկ «Կառապուզիկ» եւն)։ Սա կարող է թյուրիմացության մեջ գցել հատկապես մայրիկներին, որոնք, անվանումները տեսնելով, կկարծեն, թե հենց փոքրիկների համար նախատեսված երշիկեղեն են գնում։
Հավելենք, որ տնտեսավարողի կողմից նշված պահանջները չպահպանելը հանգեցնում է հասարակության մոլորեցման դրսեւորմամբ անբարեխիղճ մրցակցության։ Ինչի համար Մրցակցության պաշտպանության հանձնաժողովը կարող է նշանակել տուգանք տնտեսավարող սուբյեկտի տվյալ իրավախախտմանհամար` նախորդ տարվա հասույթի մինչեւ 5 տոկոսը։
Սպառողը եթե նկատի նշված պահանջների խախտումներ, ապա կարող է համապատասխան քայլեր ձեռնարկել։ Նա կամ կարող է գրավոր հաղորդում ներկայացնել Մրցակցության պաշտպանության հանձնաժողով (ձեւը հրապարակված է հանձնաժողովի «www.competition.am» կայքում), կամ կարող է զանգահարել հանձնաժողովի թեժ գծի +374-60-830840 հեռախոսահամարով։
