Պատմության հետագծով

-2005 թ.-տեղի ունեցավ Երեւանի Սուրբ Երրորդություն եկեղեցու օծման սրբազան արարողությունը։

-2007 թ. մահացել է Գառնիկ Անանյանը՝ հայ գրականագետ, հրապարակախոս, բանասիրական գիտությունների դոկտոր, պրոֆեսոր (ծն. 1934 թ.)։

-1925 թ. ծնվել է Մայա Պլիսեցկայան՝ բալետի ռուս հանրահայտ պարուհի (մահ. 2015 թ.)։

-1945 թ. սկսվեց Նյուրնբերգյան դատավարությունը՝ ընդդեմ նացիստական Գերմանիայի պարագլուխների։ Ռազմական դատավարությունների շարք, որ անցկացվեց Երկրորդ համաշխարհային պատերազմում հաղթանակած տերությունների կողմից պատերազմից հետո: Դատարանի առաջ կանգնեցին նացիստական Գերմանիայի քաղաքական, ռազմական, արդարադատության հայտնի գործիչները, ովքեր ծրագրել, իրականացրել կամ մասնակցություն էին ունեցել Հոլոքոստին եւ այլ պատերազմական հանցագործությունների։ Դատավարություններն անցկացվել են Գերմանիայի Նյուրնբերգ քաղաքում, իսկ որոշումներն ուղենշային դեր են խաղացել դասական միջազգային իրավունքից ժամանակակից միջազգային իրավունքի անցման փուլում։

-1876 թ. ծնվել է Ֆրեյդուն Աղալյանը (մ. 1944) ճարտարապետ:

-1894 թ. ծնվել է Գաբրիել Հարությունյանը (մ. 1953) հայ խորհրդային բժշկապատմաբան, մանկաբարձ-գինեկոլոգ։ Բժշկական գիտությունների դոկտոր (1953), ՀԽՍՀ վաստակավոր բժիշկ (1944)։

-1898 թ. ծնվել է Օննիկ Ավետիսյանը (մ. 1974)՝ հայ նկարիչ եւ արվեստաբան: Զբաղվել է հայկական տպագրատառերի բարելավմամբ, հրատարակել «Փորձ մը հայ տպագրական տառերու բարեփոխութեան եւ արդիականացման» (1946) գիրքը, որն արժանացել է ՀԽՍՀ-ում հայտարարված հատուկ մրցանակի։

-1899 թ. ծնվել է Գոհար Ֆերմանյանը (մ. 1958)՝ հայ նկարչուհի: 1972 թվականին Երեւանում հետմահու բացվել է Գոհար Ֆերմանյանի անհատական ցուցահանդեսը։

-1910 թ. ծնվել է Ալեքսանդր Մանասյանը՝ հայ խորհրդային անասնաբույժ: Անասնաբուժական գիտությունների դոկտոր (1954), պրոֆեսոր (1955), ՀԽՍՀ գիտության վաստակավոր գործիչ (1967)։

-1915թ. ծնվել է Սերո Խանզադյանը (մ. 1998)՝ հայ գրող, արձակագիր, ՀԽՍՀ մշակույթի վաստակավոր գործիչ (1974), Հայկական ԽՍՀ 1977 թ. պետական մրցանակի դափնեկիր («Երեք տարի 291 օր» ռազմաճակատային օրագրության համար), ԽՍՀՄ գրողների միության անդամ 1950 թվականից, ԽՄԿԿ անդամ 1943 թվականից։ Հայրենական մեծ պատերազմի մասնակից։ Սոցիալիստական աշխատանքի հերոս (1985): Երեւանի պատվավոր քաղաքացի։

-1915թ. ծնվել է Ռոբերտ Աթայանը (մ. 1994)՝ հայ երաժշտագետ, կոմպոզիտոր, ՀԽՍՀ արվեստի վաստակավոր գործիչ (1961)։ Հայ բանաստեղծ, արձակագիր, թարգմանիչ, հասարակական գործիչ Արշակ Աթայանի որդին է, Ռաֆայել եւ Արմեն Աթայանների եղբայրը։