Շուտով կլրանա ռուս-ուկրաինական ռազմական հակամարտության առաջին տարին: Եվ համաշխարհային խաղաղությունն ու հանդարտությունը խախտած այս իրադարձության նախօրյակին տեղի է ունենում պատերազմին «սերտորեն» առնչվող մեկ այլ իրադարձություն: Ինչպես հաղորդել են լրատվամիջոցները, ամերիկյան «Viatris» դեղագործական ընկերությունը Ռուսաստանի արդյունաբերության եւ առեւտրի նախարարությանը տեղեկացրել է Ռուսաստան «Վիագրա»-ի մատակարարման դադարեցման մասին: Ռուսաստանն էլ, ինչպես ասում են, «տակ» չի մնացել ու ասել է, որ սեփականը կարտադրի:
Մինչ Ուկրաինան իր դաշնակիցներից խնդրում է խթանել իր ռազմական պոտենցիալը, ամերիկյան ընկերությունը փորձում է հարվածել ռուսական գենոֆոնդի պոտենցիալին, ըստ երեւույթին, հեռահար նպատակ ունենալով կանխել ռուսական բանակի թվաքանակի մեծացումը: Փաստորեն, «Վիագրա»-ի մատակարարման, ավելի ճիշտ՝ չմատակարարման հարցն ավելի արագ է լուծվում, քան «Լեոպարդի» կամ «Աբրամսի» մատակարարման խնդիրը:
Համաշխարհային զենքի բիզնեսը, որը ինչպես այս պատերազմի, այնպես էլ բոլոր պատերազմների պարագայում ամենաշատն է շահում եւ բարգավաճում, ըստ էության, մրցակցում է մեկ այլ «զինատեսակի»՝ «Վիագրա»-ի բիզնեսի հետ: Միայն թե դրանից ռազմադաշտում խաղաղություն չի հաստատվում, նույնիսկ ընդհակառակը, խաղաղությունը հեռանում է, ռազմական գործողությունները՝ ավելի բորբոքվում: Իսկ «Վիագրա»-ի մատակարարման դադարեցումը դժվար թե բացասաբար ազդի որեւէ երկրի տնտեսության կամ զինուժի պոտենցիա(լ)ի վրա կամ ավելացնի որեւէ երկրի տնտեսության կամ զինուժի պոտենցիա(լ)ն:
Ուստի պետք է այլ ճանապարհներ գտնել ինչպես տնտեսության վրա այս կամ այն կերպ ներգործելու, այնպես էլ պատերազմը դադարեցնելու եւ խաղաղություն հաստատելու համար: «Վիագրան» հաստատ նախատեսված չէ որեւէ կողմի որեւէ տեսակի կրքերը խաղաղեցնելու համար, եթե ոչ հակառակը…
Գագիկ ԿԱՐԱՊԵՏՅԱՆ
