Ատլանտյան օվկիանոսի ափին գտնվող Կորնուոլ թերակղզու Կարբիս ծովային առողջարանային քաղաքում այսօր մեկնարկում է Մեծ յոթնյակի գագաթնաժողովը (Մեծ Բրիտանիա, Գերմանիա, Իտալիա, Կանադա, ԱՄՆ, Ֆրանսիա, Ճապոնիա), որը կընթանա մինչեւ հունիսի 13-ը։ ԱՄՆ նախագահ Ջո Բայդենը Մեծ Բրիտանիա է ժամանել դեռեւս չորեքշաբթի օրը։ Սա նրա առաջին արտասահմանյան ուղեւորությունն է, որի ընթացքում կմասնակցի Մեծ յոթնյակի եւ ՆԱՏՕ-ի գագաթնաժողովներին, ինչպես նաեւ կհանդիպի ԵՄ առաջնորդների հետ։ ՌԴ նախագահ Վլադիմիր Պուտինի հետ հանդիպումը տեղի կունենա հունիսի 16-ին։ Նախատեսված է նաեւ հանդիպում Թուրքիայի նախագահ Էրդողանի հետ։
Չնայած ամերիկացի առաջնորդը ձգտում է ամրապնդել հարաբերությունները եվրոպացի գործընկերների հետ, սակայն առկա տարաձայնությունները, որոնք սրվել են Դոնալդ Թրամփի օրոք, հազիվ թե կարելի է հաղթահարված համարել: Հիմնական պատճառներից մեկը համարվում է եվրոպացիների վերաբերմունքը ԱՄՆ քաղաքականության նկատմամբ, մասնավորապես, ինչպես հայտնում է «Bloomberg» գործակալությունը, Ֆրանսիայում, Գերմանիայում եւ Իսպանիայում հարցվածների մոտ կեսը ամերիկյան քաղաքական համակարգն անվանել է «կոտրված»: Բացի այդ, եթե Վաշինգտոնը հիմնական սպառնալիքը տեսնում է զարգացող Չինաստանի մեջ, ապա եվրոպական երկրների քաղաքացիների մեծ մասը զգուշանում է Թուրքիայից: Հարցումը ցույց է տվել, որ եվրոպացիների անվստահությունն աճում է նաեւ ԵՄ-ի նկատմամբ. Գերմանիայում, Իտալիայում, Իսպանիայում եւ Ֆրանսիայում հարցվածների մեծամասնությունը նշել է, որ այլեւս չի հավատում Միությանը:
Մեծ յոթնյակի եւ ՆԱՏՕ-ի գագաթնաժողովների ընթացքում ամենայն հավանականությամբ կձեւակերպվեն աշխարհակարգի ռազմաքաղաքական հետագա ուղենիշները։ Այսպես, Եվրոպա մեկնելուց առաջ ԱՄՆ նախագահը Վաշինգտոնի մերձակայքում գտնվող Էնդրյուս ռազմաբազայում լրագրողների հետ զրույցում հույս էր հայտնել, որ իր մասնակցությամբ Մեծ յոթնյակի եւ ՆԱՏՕ-ի գագաթնաժողովներն ազդանշան կուղարկեն Ռուսաստանին եւ Չինաստանին Արեւմուտքի միասնության մասին: Սակայն արդեն Միացյալ Թագավորության Սաֆոլկ կոմսությունում գտնվող Միլդենհոլի բազայում ԱՄՆ զորքերի առջեւ ելույթ ունենալիս Բայդենը հայտարարել է, որ ոչ մի պետություն ի վիճակի չէ միայնակ լուծել առկա միջազգային խնդիրները՝ հորդորելով միասին կառուցել ընդհանուր ապագան։ Թեեւ առաջին հայացքից կարող է թվալ, թե այդ երկու ձեւակերպումները հակասության մեջ են միմյանց հետ, սակայն դրանք ձեւակերպում են «ընդհանուր ապագայի» ամերիկյան տեսլականը։ Կրկին օրակարգում է կառավարման ժողովրդավարական ձեւեր ունեցող երկրների կենսունակությունն ապացուցելու քաղաքականությունը: «Ես հավատում եմ, որ մենք շրջադարձային կետում ենք համաշխարհային պատմության մեջ: Սա այն պահն է, երբ մեր պատասխանատվությունն է ապացուցել, որ ժողովրդավարական երկրները ոչ միայն գոյատեւելու են, այլեւ հաջողության են հասնելու»,- ասել է Բայդենը, ապա հավելել, որ պետք է մերկացնեն բոլոր նրանց, ովքեր գտնում են, որ ժողովրդավարության դարաշրջանն ավարտվել է։ Այսինքն՝ «պայքարն» ընթանալու է կառավարման ժողովրդավարական համակարգեր ունեցող եւ այդպիսին չհամարվող երկրների միջեւ։ Այդ համատեքստում կարելի է ենթադրել, որ Միացյալ Նահանգների համար առաջին հերթին այդպիսիք են Ռուսաստանն ու Չինաստանը։ «Ժողովրդավարական երկրները չեն կարող միավորվել եւ համաձայնության գալ՝ պատասխան տալու համար, ինչպես կարող են ավտորիտար ռեժիմները»,- «ՏԱՍՍ»-ի փոխանցմամբ՝ ասել է Բայդենը: Այսպիսով, այս դիտանկյունից «ընդհանուր ապագան» միասին կառուցելու հորդորը ավելի ընկալելի է դառնում։
Երեկ Մեծ Բրիտանիայի կառավարության ղեկավարի աշխատակազմի կողմից տարածված հայտարարության համաձայն, երկու երկրների ղեկավարների՝ Բորիս Ջոնսոնի եւ Ջո Բայդենի բանակցությունների արդյունքում կընդունվի Ատլանտյան նոր խարտիան, որն «իր ոգով նման կլինի 1941-ին Ուինսթոն Չերչիլի եւ Ֆրանկլին Ռուզվելտի կողմից ստորագրված Ատլանտյան խարտիային»։ Այդտեղ շարադրված սկզբունքները ժամանակին հիմք էին հանդիսացել ՄԱԿ-ի եւ Երկրորդ համաշխարհային պատերազմից հետո քաղաքական-տնտեսական աշխարհակարգի ստեղծման համար:
Եթե համադրենք այս տարվա մայիսի 10-ին ՉԺՀ ԱԳՆ մամուլի խոսնակ Խուա Չունինգի՝ ճեպազրույցի ժամանակ հնչեցրած այն միտքը, որ Չինաստանը Ռուսաստանի հետ միասին կպաշտպանի Երկրորդ համաշխարհային պատերազմի արդյունքները եւ համաշխարհային խաղաղությունը, արդեն ուրվագծվում են համաշխարհային գերակայության համար պայքարի դուրս եկած առանցքների կազմերը։
